Мирко Еличич: "Ҳужумчиларнинг голларини санашади. Гол урмасанг қадрланмайсан"

Про лиганинг 16-турида "Локомотив" "Олимпик"ни 2:0 ҳисобида таслим қилди. "Темийўлчилар" 16 турдан сўнг 36 очко жамғариб мусобақа жадвалида пешқадамлик қилишмоқда. "Локомотив" бош мураббийи Мирко Еличич собиқ клуби устидан қозонилган ғалоаба ҳақида фикрлари билан ўртоқлашди. 

- Уч очкони қўлга киритдик. Ўйиндан унчалик мамнун эмасман. Кўп вазиятларда биз тўп йўқотдик, хатоларга йўл қўйдик. Ортиқча ҳаракатлар кўп бўлди, буларни камайтириш керак. Футболчиларим қандай футбол ўйнаш кераклигини яхши билишади. Ҳали тўп билан кўп ишлашимиз керак. Бугун кўп олдинга ўйнадик, кўп ҳужумлар қилдик. Шунчаки вазиятлардан фойдаланиш, яъни, тўғри қарорлар чиқариш керак. Рақиб таркибидаги ёш футболчиларнинг иқтидори юқори. Ушбу мавсумдан кейин уларга яхши жамоалардан таклифлар бўлиши керак. Чунки уларни анчадан бери биламан. Ушбу ёшларнинг ўйинлари менга маъқул келмоқда. Умид қиламанки, ушбу ёшларнинг келажаги яхши бўлади.

- Жамоангиз кўп хато қилдими?

- Осонроқ ўйнашни ўрганиш керак, ишни қийинлаштириб юбориш керак эмас. Ўйин бунчалик қийин бўлмаслиги ҳам мумкин эди, лекин биз ўзимиз ҳолатларни оғирлаштириб юбордик. 

- Никола Попович иккита гол урди. Ушбу футболчи ҳақида фикрингиз.

- Унда етарлича сифатлар бор, бироқ барқарорлик етишмаётганди. Бу сафар у иккита гол урди ва бу яхши ҳолат. Ҳужумчиларнинг голларини санашади. Гол урмасанг қадрланмайсан. Энди у ҳам барқарорлик сари ҳаракат қилиши керак. Ўйинлар орқали ўз даражасини қайтариб олиш учун ўйнасин. 

- Чемпионатдаги танаффус чоғида режалар қандай?

- Кейинги ўйингача 3 ҳафта бор. Балки бунга оптимал ҳолатда бормаслигимиз ҳам мумкин. Агарда бундай ҳолат йил бошида бўлганида ўртоқлик ўйинлари учун рақиб ҳам бўларди, футболчиларга жисмоний юклама ҳам бера олардик. Мавсум охирида эса бу ноқулайлик туғдиради. Мавсум тугашига оз вақт қолди, ҳамма чарчаган. Бундай пайтда футболчига дам бериб, уларни бўшаштириш, шу орқали уларнинг футболдаги сифатларини сақлаб қолиш керак.