Муҳаммад Салоҳ “Ливерпуль” юлдузи билан зиддиятга борганини тан олди

“Ливерпуль”да яна икки йил қолишга розилик берган Муҳаммад Салоҳ собиқ жамоадоши Садио Мане билан муносабатларида зиддият бўлганини айтиб ўтди.

- Садио билан муносабатларимизда зиддият бўлгани рост. Лекин биз доим профессионал бўлиб қолганмиз ва ўзаро муносабатларимиз жамоа ўйинига умуман таъсир ўтказмаган.

Ҳар бир буюк ўйинчилар каттароқ ва кўпроқ нарсага эришишни истайди ва мен буни тўғри қабул қиламан. Садио Мане ҳақиқий жангчи.

Одамлар оғзига келганини гапираверади. Лекин мен уларга шуни эслатиб ўтмоқчиман: Садио Манега энг кўп голли пас узатган мен бўламан. Бу факт. Аммо кўпчилик ҳақиқатни олиб чиқишдан кўра, шов-шувли сарлавҳалар қўйишни маъқул кўради. Медиа қандай ишлашини яхши биламан.

Виждоним пок. Агар ҳаммаси ўзаро ҳурмат асосида қолса, бунга эътирозим йўқ. Лекин ҳеч нарса, ғийбатни ҳақиқатга айлантира олмайди, - деди Муҳаммад  Салоҳ.

Таъкидлаш жоизки, Садио Мане ҳозир Саудия Арабистонининг “Ан-Наср” ўйинчиси ҳисобланади.