Питер Хюистра: Пешқадам ва 3-ўриндаги жамоа иштирокидаги жуда юқори даражали ўйин бўлди

Ўзбекистон Суперлигаси 14-туридан ўрин олган "Пахтакор" - "Насаф" учрашувида пойтахтликлар 1:0 ҳисобида ғалаба қозонди. Ўйиндан кейин ташкил этилган матбуот анжуманида "шерлар" устози Питер Хюистра иштирок этди ва қуйидаги фикрларни билдириб ўтди:

"Пешқадам ва 3-ўриндаги жамоа иштирокидаги жуда юқори даражали ўйин бўлди. Рақиб бизга катта қаршилик кўрсатишга ҳаракат қилди. Улар бир неча сюрпризлар тайёрлаб қўйгани муаммо туғдира олди. Бугун тактик футбол гувоҳига айландик. Иккала жамоада ҳам вазиятлар бўлди ва мен ғалабамиздан хурсандман.

Матич ҳал қилувчи голни урганини кўриш ёқимли. Бу каби ўйинлар менга ёқади. Боиси, унда кўпроқ ўйланишга ҳаракат қиласан. Бунинг учун "Насаф"га ҳурмат бажо келтирмоқчиман. Тўғри, рақиб бугун яхши футбол намойиш этди. Бироқ ўйин назорати улар қўлида бўлди, дея олмайман. Баъзи жиҳатлар устида ишлаб, уларни яхшилашимиз лозим.

Матичнинг ижобий томонлари кўп. У машғулотларни қаттиқ меҳнат қилиш ва ўзини кўрсатишдан қўрқмайди. "Пахтакор"га тўлиқ мослашиб кетиши учун унга вақт керак. Боян жамоавий футболда ўзини яхши ҳис этади. 

Ҳамдамов жамоага қайтганидан хурсандман. У бизнинг клуб тизимига жуда мос футболчи эди ва легионер сифатида ўйини ўхшамаганига "Пахтакор"га боғланиб қолгани сабаб бўлгандир. Тўғри, ёшлар билан ишлаш керак. Мен бу фикрни доим илгари сурганман. Кўрганингиздек, Достон бугун асосий таркибда ўйнамади. Унинг жамоада эканлиги Диёр Холматовни доимий сергакликда ушлаб туришга хизмат қилади. Улар ўртасида самимий рақобат бор.

Яна бир жиҳатни унутмайлик, Достон эндигина 24 ёшга кирди ва уни ёши катта футболчи, деб бўлмайди. Шунингдек, у "Пахтакор"га қайтиш учун маоши анча камайишига ҳам рози бўлди".