Расман! Роналду "Ливерпуль"га қарши ўйинда иштирок этмайди

"Манчестер Юнайтед" ҳужумчиси Криштиану Роналду ўғли вафот этгани сабабли АПЛнинг 34-тури доирасида "Ливерпуль"га қарши ўйинда иштирок этмайди. Бу ҳақда клуб матбуот хизмати хабар тарқатмоқда.

“Оила биринчи ўринда туради ва Криштиану Роналду бу ўта оғир дамларда ўз яқинларини қўллаб-қувватлайди. У сешанба оқшомида “Энфилд”да "Ливерпуль"га қарши ўйнамаслигини тасдиқлашимиз мумкин”, - дейилади клуб баёнотида.

Эслатиб ўтамиз, куни кеча Криштиану Роналду твиттер саҳифасида севгилиси Жоржина Родригес билан бирга ўғлининг туғилиш вақтида вафот этгани ҳақида маълум қилган эди. Ушбу жуфтлик эгизак фарзандли бўлиши керак эди. Аммо фақатгина қиз тирик қолди.