Расулжон иккинчи ўрин, Чусовитина эса...

Туркиянинг Анталия шаҳрида спорт гимнастикаси бўйича жаҳон кубогининг учинчи босқичи якунланди. Қувонарлиси, унда ҳамюртимиз Расулжон Абдураҳимов кумуш медални қўлга киритди.

Аниқроқ айтадиган бўлсак, Расулжон жаҳон кубогининг мазкур босқичи финал баҳсларида 14,200 балл натижани қайд этди. Ушбу йўналишда туркиялик Ферхат Арикан олтин, япониялик Юсуки Танака бронза медалига сазовор бўлди. 

Шунингдек, аёллар терма жамоамизнинг ягона вакили, афсонавий гимнастикачимиз Оксана Чусовитина сакраш беллашувларида  тўртинчи натижани қайд этди. 

Эслатиб ўтамиз, ўтган ойда Германиянинг Котбус шаҳрида спорт гимнастикаси бўйича Жаҳон кубогининг иккинчи босқичида Расулжон Абдураҳимов брусдаги машқларда бронза медали билан тақдирланган бўлса, шу ойнинг бошида Оксана Чусовитина Озарбайжоннинг Боку шаҳрида ўтган Жаҳон кубогида таяниб сакраш йўналишида 13.516 балл тўплаб, олтин медалга сазовор бўлган эди.