“Реал” мавсум олдидан катта йўқотишга дуч келганини эълон қилди

Ўтган чемпионатда бош сорвинни ашаддий рақиб “Барселона”га бой бериб қўйган “Реал” Ла Лиганинг навбатдаги мавсумига пухта тайёргарлик кўради.

Бу гал мадридликлар бошқа мураббий – Хаби Алонсо қўл остида Ханс-Дитер Флик бошчилигидаги “Барселона”ни тўхтатишга уриниб кўради.

“Қироллик клуби” расмий сайти чемпионат остонасида таркибда йўқотиш бўлганини эълон қилди.  Маълумотларга қараганда, асосий таркиб вакилларидан Эдуардо Камавинга жароҳат олиб сайдан чиққан.

Ўтказилган тиббий текширувлар франциялик ярим ҳимоячининг ўнг оёқ тўпиғи шикастланганини кўрсатди. Айни пайтда шифокорлар футболчининг жароҳатини даволаш ишларини бошлаб юборган ва ҳозирча, Эдуардо қачон майдонга қайтиши номаълум.

“Реал” Ла Лиганинг биринчи турини 19 август куни “Сантьяго Бернабеу” стадионида “Осасуна” футболчиларига қарши ўтказиши белгиланган.