Санчо Туркия грандининг таклифини қабул қилди

"Манчестер Юнайтед" клуби вингери Жейдон Санчо Туркиянинг "Фенербахче" клубидан шартнома таклифини қабул қилди, деб хабар бермоқда Sabah Spor нашри. Англиялик футболчи йилига 10 миллион евро маош олади. "Фенербахче" ҳозирча "Ман Юнайтед" билан расмий музокараларга киришмаган бўлса-да, битим муваффақиятли якунланишига умид қилмоқда.

Манчестер клуби ҳам Санчо билан хайрлашишга тайёр, чунки унинг 12 миллион евро миқдоридаги йиллик маоши клубнинг молиявий юкини ошириб юборган. Аввалроқ футболчи билан "Наполи" ва "Ювентус" музокаралар олиб бораётгани ҳақида хабарлар чиққан эди.

Ўтган мавсумда Санчо "Челси"да ижарада тўп сурди. У Конференциялар лигасида жамоа билан ғалабани қўлга киритди, мусобақада 2 та гол урди ва 5 та голли узатмани амалга оширди. Шунингдек, "Челси" Санчо билан Чемпионлар лигасига йўл олди. Бироқ Лондон клуби футболчини тўлиқ сотиб олмасликка қарор қилди.