Слот: "Галатасарай"га қарши ўйинда майда-чуйда нарсалар бизнинг фойдамизга ҳал бўлмади"

"Ливерпуль" бош мураббийи Арне Слот Чемпионлар Лигаси 2-туридаги мағлубиятдан (0:1) кейин "Галатасарай"нинг ҳаракатларини баҳолади.

"Яна ҳафсалам пир бўлди. Тўп билан ҳам, тўпсиз ҳам "Кристал Пэлас"га қарши ўйиндан бутунлай бошқача тарзда ўйнадик. Биринчи бўлимда анча яхши ўйнаб, 1:0 ҳисобида олдинга чиқиш учун қулай имкониятга эга бўлдик. Баъзида бундай вазиятларда (пенальти каби) бизни қандайдир тарзда чалғитишга эришишади, бунинг учун Доминик Собослаини айблай олмайман. Улар 20 фоизлик пенальтини 100 фоизликка айлантиришди, жуда айёрона иш бўлди. 

Биз ўтган мавсумда кўрсатган даражамиздан унчалик узоқлашганимиз йўқ. Баъзида бундай натижалар жадвалга боғлиқ бўлади, "Галатасарой"га қарши ўйин асло осон эмас. Энди "Челси" билан оғир ўйин кутмоқда. Ҳамма нарса ўтган мавсумдагидек майда-чуйдаларга боғлиқ. Кетма-кет иккинчи марта бу майда-чуйдалар бизнинг фойдамизга ҳал бўлмаяпти. Биринчи ярмида кўп нарсани кузатдим, иккинчи ярмида эса анча камроқ. Танаффусдан кейин тўп ўйинда кўп бўлмаганини ўйлайман, рақиб ҳужумчиси тўрт-беш марта майдонга йиқилиб қолди. Ўйин суръатини ушлаш қийин бўлди", – деди Слот "Amazon Prime" эфирида.

Шунингдек, мураббий дарвозабон Алиссон жароҳати сабаб "Челси"га қарши ўйинда майдонга тушмаслигини тасдиқлади.