Теннисчилар Наманганга келди...

Халқаро теннис федерацияси мусобақалари тақвимидан жой олган “J60” таснифига кирувчи халқаро турнирга Наманган шаҳри мезбонлик қилмоқда. Ўсмирлар ўртасида ўтаётган мазкур мусобақада теннисчиларимиздан ташқари Қозоғистон, Қирғизистон, Гонконг, Тожикистон ва Хитой каби давлатлардан келган ракетка усталари рақобатлашмоқда.

Яккалик баҳсларининг ўғил болалар ўртасидаги илк давра учрашувларида ҳамюртимиз Нуриддин Бахтиёров нейтрал теннисчи Никита Клецовни 6:0, 3:6, 6:1 ҳисобида таслим қилган ҳолда нимчорак финалга чиқди. Шунингдек, бугун ушбу босқичда Суҳроб Саидов нейтрал теннисчи Артем Светлов, Абдураҳмон Каримов қозоғистонлик Артем Сидоров, Абдулазиз Усмонжонов нейтрал теннисчи Тимур Даутов билан куч синашади.

Қизлар орасида эса яккалик беллашувларида ҳамюртимиз Злата Чиннова қирғизистонлик Сафина Ҳабибраҳмоновага қарши кортга чиқса, умидли теннисчимиз Нигина Алимов қозоғистонлик Сара Хамитовани синовдан ўтказади.

Дарвоқе, 29 март кунига қадар ўтадиган мазкур турнирнинг жуфтлик баҳсларида ҳам илк босқич беллашувлари ташкил этилмоқда.