Василий Ломаченко - Теофимо Лопес жангининг санаси яна ўзгарди

Василий Ломаченко ва Теофимо Лопес  ўртасидаги узоқ  кутилган енгил вазндаги мутлоқ чемпионлик жанги санаси яна ўзгариш арафасида.

Дастлаб, ушбу жанг  30 май куни Нью-Йоркдаги “Мэдисон-Сквер-Гарден” аренасида бўлиб ўтиши режа қилинган, аммо  коронавирус пандемияси туфайли 19 сентябрга кўчирилганди. Жанг, катта эҳтимол билан сентябрь ойида ҳам бўлмайди. Чунки, “Top Rank” раҳбари Боб Арум “Boxingscene” сайтига берган интервьюсида Ломаченко - Лопес қарама-қаршилиги 3 октябрда бўлиб ўтиши ҳақида айтиб ўтган.

"Лома - Лопес тўқнашувини 19 сентябрга  мўлжаллаган эдик. Аммо, ушбу жангни  PPV (пуллик трансляция) сифатида 3 октябрга кўчирмоқчимиз. Невадада  тезлик билан тарқаётган вирус сабаб, биз бокс оқшомини бу муддатда чекланган томошабинлар билан ҳам ўтказа олмаймиз. Агар, рухсат берилса, ушбу тўқнашувни 2000 ёки 2,500 томошабин кўз ўнгида ўтказмоқчимиз”, - деди Арум.