"10-15 дақиқа ВАРга сарфланмоқда", "Англияда футбол бошқача ўйналади, бизда фақат ҳуштак, ҳуштак, ҳуштак..." - "Динамо" сардори Темур Исмоилов билан интервью

SPORTS.uz сайтида янги лойиҳа! Энди "Етакчи" лойиҳаси орқали Суперлигамиз жамоаларининг етакчилари билан интервью уюштирамиз. Бизнинг илк суҳбатдошимиз "Динамо" клуби сардори Темур Исмоилов.

Аввало, жамоа ва ундаги ички муҳит ҳақида икки оғиз тўхталсангиз.

- Жамоамизда ички муҳит аъло даражада. Футболчилар бир-бири билан дўстона муносабат ўрнатган. Исталган рақибга қарши вазиятлар яратмоқдамиз, бироқ омад етишмаяпти. Ҳеч кимдан кам жойимиз йўқ! Ғалабалар йўқлигига нима сабаб бўлаётганини тўғриси, билмайман. "Динамо" клуби ўз олдига ҳозирча Суперлигада жон сақлаб қолиш ва иложи борича юқорироқ ўринни эгаллаш мақсадини қўйган.

Хорижлик мураббий билан ишлаш бироз ноқулайлик туғдирмаяптими? Умуман олганда, жаноб Роганнинг ўзбек мутахассисларидан фарқини нимада?

- Тўғриси, Роган яхши даражадаги мураббий экан. У ўз ғояларига эга. Балки биз унинг кўрсатмаларига тўлиқ амал қила олмаётгандирмиз. Мен унинг бир ҳислатини эътироф этмоқчи эдим: жаноб Предраг футболчиларда ўзига бўлган ишончни уйғота оларкан. Рақиб ким бўлишидан қатъи назар, бизнинг улардан кам эмаслигимизни, ўйинимизни йўлга қўйиб олсак, натижа ўз ўзидан келаверишини бот-бот таъкидламоқда.

"Бунёдкор"дан мағлубиятга учралган ўйинда ҳакам бироз кўпроқ ҳуштак чалди, назаримда. Аммо жамоа ўйинни "ўлдириш" ўрнига олдинга ўтиб, прессинг қилаверди. Бу ҳам мураббийнинг кўрсатмаси билан боғлиқми?

- Мураббий бизга кўпроқ прессинг қилишимиз кераклигини айтади. Аслида, рақиб ярим майдонида уюштирилган босим анча фойдали ҳисобланади. Бунда тўпни олиб қўйиш эҳтимоли юқори. Мудофаада катта вақтни ўтказиш эса, салбий оқибатларга олиб келиши турган гап. Олдинги чизиқда прессинг қилишимиз тўлиқ мураббий топшириғи билан бўлмоқда.

Ҳакамликка келсак, баъзи ўйинларда 10-15 дақиқа вақт ВАРга сарфланмоқда. Айрим реферилар тўлиқ қарор чиқара олмаяпти. Футболчига майдонда ҳаракат қилиш имкониятини бериш лозим. Ҳар 2-3 дақиқада ҳуштак чалиш ўйинни "ўлдиради". Ўз навбатида, бу майдондагиларга ўз таъсирини кўрсатмай қолмайди. Инглиз футболини томоша қилинг, у ерда футбол бошқача ўйналади. Озгина тегиб кетгани учун ҳам ҳуштак чалинавермайди. Яккакурашларга қўйиб бериш керак. Бизда эса, фақат ҳуштак, ҳуштак, ҳуштак... Қандай қилиб бу ҳолатда футбол ўйнаш мумкин? Инсон психологик томондан "синиб қолиши" ҳеч гап эмас.

Мағлубиятда ҳакамнинг айби бор, дея оласизми?

- Йўқ, ҳакамни деб ютқаздик, дейиш нотўғри. Аммо рефери майдонда ўйнашга бериши лозим. Рақибни секингина туртсангиз ҳам ўйинни тўхтатаверишади. Бироқ айрим ҳакамлар яккакурашларга имкон беради. Йиқилган футболчи жарима сўраса, "Бу - футбол!" - дея жавоб қайтаришади. Лекин ҳамма ҳам бундай эмас. Улар бу қоидани қаерда ўқиганини билмайман. 

Жамоа узоғи билан нечанчи тургача ўз ўйинини йўлга қўйиб олади деб ўйлайсиз?

- Аниқ санасини келтира олмайман, бироқ қачон хатоларимизни кўриб, уларни тўғирлаб, ўз устимизда янада яхшироқ ишламагунимизгача ғалабалар келмайди. Бу йўлда меҳнат қилишдан чекинмаймиз.