«Пеналдо» ёҳуд «Реал»га етишмаётган Роналду

Европа чемпионлигини ҳимоя қилишда барча даврларнинг энг яхши тўпурарисиз қийин бўлишини «Реал Мадрид» ҳозирда бошидан кечирмоқда ва ҳам ички чемпионат, ҳам Чемпионлар Лигасида ўзига муносиб ўринларда бораётгани йўқ.

«Қироллик клуби» ўтган йили ҳам мана шундай босқичда қолиб кетган эди. Аммо бу йилгиси ўтган мавсумдагидан фарқли эмасми? Нега Хулен Лопетегини кетиши ойдинлашиб бормоқда? Нега мавсум стартида клубга ишонч қолмади?

Ўтган мавсум бошида Зинедин Зидан унгача икки марта Чемпионлар Лигасини ва бир марта Ла Лигани ютгани туфайли клуб мухлислари ва Флорентино Переснинг тўлиқ ишончига суянган эди.

Гарчи ўтган йили ҳам худди шу вақтда улар қийинчиликлар гирдобига тушиб қолганди, аммо «Реал» баҳорда яна ўзига қайта келиб олиши ва навбатдаги Чемпионлар Лигасини ютишига қандайдир ишонч бор эди.

Бу эса амалда исботланганди. Мавсум стартини қўрқинчили тарзда бошлаганларига қарамай якунда Лорис Кариуснинг нўноқлиги ва Гарет Бейлнинг Киевдаги фантастик ўйини эвазига жамоа мавсумни 13 марта Чемпионлар Лигасини қўлга киритиш билан якунлаганди.

Клуб ўтган йили мавжуд муаммоларга аҳамият бермади ва алоҳида футболчиларнинг индивидуал маҳоратлари эвазига бундан чиқиб кетганди.

Бироқ клуб ўтган мавсумда ҳам «Валенсия», «Леванте», «Бетис», «Жирона» ва «Тоттенхем» каби жамоаларга қарши омадсиз ўйнаганини унутмаслик керак. Ўшанда ҳам Зиданнинг кетиши, Ла Лига чемпионлиги ҳимоя қилиниши эртароқ якунлангани ҳақида гапирилганди.

Айни вақтда эса Лопетеги на мухлисларнинг, на Переснинг ишончига суяна олади. У сўнгги ютуқларини такрорлай олмаяпти, футболчилар билан муносабатлари яхши бўлсада, барчаси узоқ келажакда изига тушиб кетишини айтишдан чарчамаяпти.

Бу қийиндек, чунки унинг қўли остида Криштиану Роналду йўқ!

Ўтган мавсум стартида таркибда Роналдунинг йўқлиги нималага олиб келишини кўрдик. Испания Суперкубогида «Барселона»га қарши ўйинда ўзини қўпол тарзда тутган португалиялик футболчи тўрт учрашувга дисквалификация қилинганди.

Усиз мадридликлар муҳим очколар йўқотганди. Моҳир тўпурарисиз ишлар мураккаблашиб кетишини ҳис қилишганди. Зидан ва «Реал»нинг бахтига Роналду Чемпионлар Лигасида чақнай олганди.

«Уэмбли»дан «Тоттенхем»га қарши кечган ўйиндан ташқари Роналду Европада ҳеч қандай муаммоларга дуч келмади.

У вақтни қувиб ўтди ва «Боруссия Дортмунд», «ПСЖ» ва айниқса «Ювентус»га қарши муҳим голларни киритди. «Реал»нинг муҳим ўйинлардаги стратегияси Рамоснинг рақиб ҳужумини тўхтатиши, Роналдунинг эса голлар уришидан иборат бўлди.

Лопетеги эса Зидандан қолган мана шундай стратегиядан воз кечди. Клуб тўп назоратини яхши ушламоқда, бироқ уларда ҳужумларни якунлайдиган бирорта мард топилмаяпти.

Бу вазифани аввалига Карим Бензема, Гарет Бейл ва Марко Асенсионлар яхши бажара оладигандек таассурот уйғотганди. Бироқ кейинчалик барчаси сароб эканлиги маълум бўлди.

Роналдуни фаолияти давомида фақат пенальтидан ёки жудаям оддий голлар уриши билан айблаб келишди. Бироқ ўша оддий голлар жамоасига чемпионатда ЕЧЛда охиригача курашишига ёрдам берди. Агарда гол уриш шунчалик осон бўлганида нега «Реал» ҳозирда гол уришда муаммога дуч келмоқда?

Роналдунинг рақиб жарима майдончаси яқинида ҳаракатланиши ва пайт пойлаб ўз имкониятини ишга солиши унинг муҳим жиҳати эди.

«Қаймоқранглилар» эса ўша «кафолат»ни сотишга қарор қилди. 33 ёшни уриб қўйган футболчининг трансфер нархи эса одамни шошириб қўяди.

Мана яна «Эл Классико» яқинлашиб келмоқда ва клуб бош мураббийининг тақдири дерби натижасига боғлиқ бўлиб қолган. Ўтган мавсумда мадридликлар дербининг бирортасида ҳам ғалаба қозона олмаганди. Улар етакчи мураббий ва юлдуз ҳужумчига жуда ўрганиб қолишганди. Энди уларнинг ўрнини тўлдириш анча қийин бўлади.