Римда "Ливерпуль" мухлисига арматура билан ҳужум қилишди

“Ливерпуль” клуби мухлиси Карл Жонсонга “Рома”га қарши ЕЧЛ ярим финал жавоб учрашуви олдидан Римда ҳужум қилишди, дея хабар беради Mirror нашри. Воқеа Жонсоннинг Италия пойтахтидаги сайрдан сўнг меҳмонхонага қайтаётганда рўй берган.

Йўлда унга нотаниш кимса унча катта бўлмаган арматура билан ҳужум қилган ва оқибатда Жонсоннинг бир қанча жойи жароҳат олган, бироқ у қочишга улгурган. Ҳозирча бу ҳужум айнан футбол сабабли уюштирилганлиги номаълум.

Айни дамда эса Римдаги бекатларда Ливерпулдагидан фарқли равишда барча ҳотиржам ва дўстона кайфиятда эканлиги айтилмоқда. Бу жамоаларнинг Англияда ўтган биринчи учрашуви олдидан 53 ёшли “Ливерпуль” мухлиси Шон Коксга пичоқ билан ҳужум қилинган ва у шу вақтга қадар шифохонада даволанмоқда. У ҳаттоки кома ҳолатини ҳам бошдан кечирган.

Римдаги жавоб баҳсига 5000 нафарга яқин “Ливерпуль” ишқибози ташриф буюрган. Италия пойтахти ҳукумати хавфсизлни таъминлаш мақсадида 1200 нафар полиция ходимини сафарбар этган. Бу борада маҳаллий ҳуқуқни ҳимоя қилувчи орган вакиллари британиялик ҳамкасблари билан ҳамкорликда ишламоқда.

“Ливерпуль” ва “Рома” ўртасидаги илк учрашув мерсисайдликларнинг 5:2 ҳисобидаги ғалабаси билан якунланган. Иккинчи учрашув бугун тунда Тошкент вақти билан 23:45да старт олади.