Yoshlar sport haftaligi boshlandi

Xabaringiz bor, aholining barcha qatlamlari orasida jismoniy tarbiya va sportni ommalashtirish maqsadida joriy yilning oktyabr oyi boshidan boshlab, Respublikamizning barcha hududlarida «Yoshlar sport haftaligi», «Xotin-qizlar sport haftaligi», «Mahalla va nuroniylar haftaligi», «Ta’lim muassasalari haftaligi» o‘tkazildi.

Ushbu haftaliklarni yuqori saviyada tashkil etish, aholi, ayniqsa yoshlarni ommaviy sportga jalb etish maqsadida 2018 yil IV choragida aholining barcha qatlamlari o‘rtasida o‘tkaziladigan sport va ommaviy jismoniy tarbiya tadbirlarining kalendar rejasi ishlab chiqildi.

Rejaga asosan ushbu haftaliklar yil davomida o‘tkazib borilishi belgilangan bo‘lib, joriy yilning 29 oktyabr – 4 noyabr kunlari respublikamizning barcha tuman va shaharlarida «Yoshlar sport haftaligi» o‘tkazilmoqda.

Haftalik davomida futbol, futzal, basketbol, voleybol, gandbol, stol tennisi, badminton va suzish bo‘yicha o‘yinlar, sport kurashlari va Sharq yakkakurashlari bo‘yicha sport festivallari tashkil etilmoqda.

Haftalik davomida faol ishtirok etgan yoshlar qimmatbaho sovg‘alar bilan rag‘batlantirib boriladi.

Jismoniy tarbiya va sport vazirligi

Matbuot xizmati