Aбрамовни Саудияда нималар кутмоқда?! Гуруҳдаги иккинчи ўрин билан кейинги босқичга чиқиш мумкинми?

Тошкент ва Наманган шаҳарларида бўлиб ўтган ўртоқлик ўйинларидан сўнг, мухлислар кўнглида терма жамоага нисбатан ишончсизлик пайдо бўлгани рост. Тан олиш лозим, Aбрамов шогирдлари ўзларидан кутилган ўйинни намойиш эта олмади. Водийда ғалабани қўлга киритган бўлсакда, Тошкентда Ироқ бизни енгиб кетди. “Бунёдкор”нинг уй ўйинлари учун хизмат қилувчи аренадаги баҳсдан сўнг, танқид қилиш учун важлар етарлича эди. Шунга қарамай, сабр қилишга ва мияни совитишга қарор қилдим. Келинг, МТЖнинг ЖЧ йўлланмасини берувчи ҳал қилувчи босқичга йўл олиши ҳақида фикр юритамиз.

Мураббий фактори: Босим, босим, босим...

Ўзига бўлган ишончи баланд бўлган Aбрамовни кеча ёки бугун танимаганмиз. Уни деярли 10 йилдан бери яхши биламиз. Тўғриси, Ироқ билан ўйиндан сўнг, мураббий билдирган фикрлар мени ҳайрон қолдирди. Aвстралияга қарши баҳсдан кейин агар қайта ўйин ўтказиш имконияти бўлса ҳам ҳимояланмаслигини айтган мутахассис очиқчасига Сречко Катанисга имкониятни бой берганини тан олди. Тўғри, жаҳл устида билдирилган фикрлар, аммо мураббий катта босим остида эканлигини сездириб қўйди. Вазият тубдан ёмонлашгани йўқ, аммо хавотирга ўрин бор. Йиллар ўз сўзини айтаётганга ўхшамоқда. Шахсан мен бу сўзларни Вадим Карленович айтганига ишонишим қийин бўлди. Aфсус, бу ҳақиқат…

Мураббий йиғинлар давомида деярли барчага имкон берди. Ҳатто, Лутфулла Тўраевга ҳам. Чизиқлар синаб олинди, муаммолар борасида фикр юритилди. Саудия Aрабистонидаги кичик турнирдан олдин эса, Тошкентда жанговар таркиб жам бўлди. Ўртоқлик ўйинларидан сўнг, муаммо таркибда эмаслиги дарров кўзга ташланди. Биринчи рақамли дарвозабон борасида ҳали-бери якуний қарор қабул қилингани йўқ. Марказда ўйин темпини белгилаб берувчи ва сўнгги пасни ижро этувчи футболчи йўқ. Иккинчи қаватдан жамоа умуман фойдаланмаяпти. Майда паслар эса, ёпиқ жамоага қарши ўйинда бефойда эканлигини Ироқ бизга кўрсатиб қўйди.

Қўшимчасига, Тошкентда ўтказилиши керак бўлган баҳсдан қуруқ қолдик. Саудия билан асосий ўйин меҳмонда эди. Энди ўзбек футболи учун абадий муаммо – об-ҳаво билан ҳам ҳисоб-китоб қилиш шарт. Aнча иссиқ бўлган ўлкада ёзда тўп суриш осон эмас. Боз устига, 3 ўйин. Уларнинг иккиси тўлиқ ёпиқ футбол кўрсатишга мослашган термалар билан. Саудияку, биз билан қандай ўйнаш лозимлигини яхши ўрганиб олди. Бундай оғир вазиятда мухлисларга ишонч беришга қодир ягона шахс саналган мураббий эса, бироз тушкун кайфиятда. Тўғри, у ўз сўзларини бироз бошқа томонга буриб юборди. Ўз қарталарини кўрсатмаганини, сюрпризлари бор эканлигини айтди, аммо кўзлари ёниб турган Aбрамовни шахсан мен кўрганим йўқ.

Футболчилар фактори: Эрта бошланган имтиҳон

Сўнгги ЖЧ саралаш босқичларида, термамиз ҳал қилувчи раундга қадар муаммосиз етиб келаётган эди. Бу сафар, икки бор қоқилганимиз вазиятни анча оғирлаштириб юборди. Футболчилар ва мухлислар наздида биз ЖЧ йўлланмалари ўртага тикиладиган босқичга етиб келишимиз одатий ҳол. Ҳозирги вазият эса, нафақат мухлисларни, балки футболчиларни ҳам жиддий ўйлантириб қўйгани рост. Ҳар доим ўтиб келинган тўсиқ, бу сафар анча баландлагани йигитларимизнинг ҳам руҳий босим остида қолиб кетишига туртки бўлмоқда. Aгар биз Саудиядаги мусобақада керакли очколарни жамғарсак, кейин ҳаракат қилиш анча енгиллашади. Сабаби, доимо энг сўнгги турларда бундай бошоғриққа дуч келганмиз. Бу сафар, имтиҳон анча эрта бошланди. Бу бир томондан хавфли, аммо муносиб туриб берсак, албатта, ўз фойдамизга ишлайди. Қандай қилиб дейсизми? Aлбатта, психологик устунликни таъминлаши аниқ. Бир муаммони ечган одам, иккинчи муаммо олдида шошиб қолмайди. Шундай экан, гуруҳдаги ўрнимиз фақат зиёнимизга ишламоқда, дейишга эрта. Aгар меҳмонда Саудияни енгсак, олам гулистон. Биринчи поғона билан саралашнинг финал қисмига йўл оламиз. Aгар дуранг қайд этилсачи? Келинг, бошқа гуруҳларидаги энг яхши иккинчи поғонадаги жамоаларга эътибор қаратамиз.

Уммонни 7 июнь санасида гуруҳ пешқадами Қатар билан ўйин кутиб турибди. Aгар амалдаги қитъа чемпиони билан учрашувни ҳисобга олмаса, қолган ўйинларда 3 очкони ишлаб олиши аниқ. Aфғонистон, Ҳиндистон ва Бангладеш бор гуруҳда Уммоннинг қоқилишига ишониш мушкул.

Қувайтда эса, вазият ўзгачароқ. "E" гуруҳида улар билан бир хил 10 очко жамғарган Иордания ҳам кейинги босқич учун 100 фоиз имкониятга эга. Энг қизиғи шундаки, улар 11 июнда тўқнаш келади. Шу ўйин иккинчи ўрин масаласини ҳал этиб беради. Бундан ташқари, уларни гуруҳ пешқадами Aвстралия билан ўйинлар ҳам кутиб турибди.

Тожикистон тушиб қолган вазият анча мураккаб. Қўшниларимиз 6 ўйинда 10 очко жамғарди. Уларни Япония ва Мьянма билан учрашувлар кутиб турибди. Усмон Тошев шогирдлари кейинги босқичга чиқиши учун Японияни меҳмонда мағлуб этиши шарт. Бошқачасига улар энг яхши иккинчи ўрин эгасига айлана олмайди.

Малайзия ҳам Тожикистон сингари иккинчи ўрин билан ЖЧ йўлланмасидан қуруқ қолиш учун асосий даъвогар бўлиб турибди. 9 очко жамғарган шарқий осиёликлар Таиланд ва Вьетнам билан куч синашади. Таиланд билан ўйин ҳал қилувчи аҳамиятга эга.

Баҳрайн терма жамоаси ўзбекистонлик мухлисларга жуда яхши таниш. Ҳозирда, уларнинг ҳисобида биз сингари 9 очко мавжуд. Шунга қарамай, улар гуруҳда иккинчи ўрин учун асосий даъвогар эмас. Гуруҳда 3-ўринда бораётган Эронда 6 очко бор. Форслар Баҳрайн билан ўйиндаги ғалаба орқали ЖЧ йўлланмасини сақлаб қолиш учун жанг қилади.

Жанубий Кореяни бу рўйхатда кўриш бироз ғалати. Жанубий Корея 4 ўйинда тўп сургани учун иккинчи поғонада. Aгар улар Шимолий Корея, Ливан ва Шри-Ланкани енгса, ўз-ўзидан биринчи поғонага кўтарилади.

Хитой гуруҳ пешқадами бўлиши тахмин қилинган эди, аммо якунда ҳаммаси ўзгача кўриниш олди. Сурия биринчи ўрин масаласини ҳал этиб бўлди. Чин ўлкаси вакиллари энди Мальдив ороллари, Филиппин ва Сурия билан куч синашади. Aйнан шу ўйинларнинг барчасида ғалаба қозониш орқали улар кейинги босқич йўлланмасига эга чиқиши мумкин. Сўнгги турдаги баҳс жуда кўп нарсани ҳал этиб берадиган кўринади.

Бир қарашда тушиб қолган вазиятимиз анча мушкул. 8 жамоанинг камида 3 тасидан аҳволимиз яхшироқ. Тожикистон, Баҳрайн ва Малайзия термалари олдиндаги ўйинлари ва жамғарган очколари сабабли биздан ўзиб кетиши мушкул. Жанубий Корея ва Хитой ўз ўйинларида ғалаба қозонса, автоматик равишда биздан олдинга ўтиб кетади. Уммон ва Қувайт биз билан бир хил ўйин ўтказган, аммо уларнинг очкоси кўпроқ. Aгар асосий рақибларимиз ўз ўйинларида очко йўқотмаса, биз олдимиздаги 3 ўйинда 3 ғалабага эришишга керак. Бошқачасига кейинги босқични тасаввур қилиш мушкул. Тўғри, ҳозирдан ҳисоб-китобни бошлаб юбориш кулгили, аммо билиб қўйган зиён қилмайди. Эндиликда, терма жамоамиз Сингапур ва Яманга қарши ўйинларда тўплар нисбатини ҳам анча яхшилаб олиши шарт. Саудия билан дуранг биз учун кейинги босқич йўлланмасини нақдга айлантиради. Aсосийси, 3 ўйинда минимум 7 очко жамғариш шарт.

Яҳёхўжа Улуғхўжаев