Аълохон Абдуллаевнинг навбатдаги жанг санаси ва рақиби маълум бўлди. У Жанубий Америкада жанг қилади!

Истеъдодли боксчимиз, ёшлар ва катталар ўртасида жаҳон чемпионати совриндори Аълохон Абдуллаевнинг навбатдаги жанг санаси ва рақиби маълум бўлди. Хабарингиз бор, юртдошимиз IBA чемпионлар оқшомида 2 маротаба жанг қилиб, ажойиб ғалабаларни қўлга киритган эди. Ушбу турнир доирасидаги 3-жангини вакилимиз  Жанубий Америкада ўтказадиган бўлди. Яъни, 21 ноябрь куни боксчимиз Эквадорнинг Кито шаҳрида рингга кўтариладиган бўлди. У мезбонлар вакили, тажрибали Абел Минага қарши баҳс юритади. Мина ўзбекистонлик ашаддий бокс ихлосмандларига нотаниш эмас. У ҳаваскор йўналишда яна бир юртдошимиз Шаҳрам Ғиёсов билан тўқнаш келган ва унда ҳамюртимиз ғалаба қозонган эди.
 
Мина профессионал боксда 21 та жанг ўтказган ва уларнинг 17 тасида ғалаба қозонган. 3 мағлубият ва бир дуранг қайд этган. Шу ўринда алоҳида таъкидлаб ўтиш керакки, мазкур қарама-қаршилик ғолиби навбатдаги жангида IBAнинг чемпионлик камари учун рингга кўтарилади. Жанг -75 кг вазн тоифасида бўлиб ўтади. 
Албатта, ушбу муҳим жангда ҳамюртимизга омад тилаб қоламиз!