Амир Ғаленойи: "Биз бир-биримизни яхши биламиз"

Бугун финал олдидан иккала терма жамоалар ўртасида матбуот анжумани бўлиб ўтди. Матбуот анжуманининг иккинчи қисмида форслар устози Амир Ғаленойи ҳам иштирок этди. 

"CAFA келажакда минтақа футболига ёрдам бериши мумкин, аммо бу мавсум ҳар жабҳада ёмон ҳаракат қилди. Ҳакамлик, ташкилотчилик, рақиблар ва ҳамма-ҳаммаси. Яхши ташкил этилмаганини кўплаб жамоалар шикоят қилишгани ҳам айтиб турибди.

Ўзбекистон ва Эрон бир неча йиллардан буён кўп тўқнаш келмоқда. Ўзбекистон сўнгги йилларда футболга катта сармоя киритди, маҳаллий чемпионат кучайди. Биз бир-биримизни яхши биламиз. Умид қиламанки, эртага яхши, мухлисларбоп ва тактик ўйин бўлади. Эртага яхши натижага эришишимиз учун ўйинчилар ўзларининг вазифаларини бажаришлари шарт бўлади. Ўзбекистон ҳам ўз клубларига яхши сармоя киритди, бир қанча футболчилари Осиё ва Эрон чемпионатининг нуфузли жамоаларида тўп сурмоқда. 

Теҳронда 4 та машғулот ўтказиб, кейин турнирга киришимиз керак эди. Чемпионат ўйинлари тугашини кутиб, хатога йўл қўйдик. Миллий чемпионатнинг ўз шартлари бор. Эшитдимки, бир дўстим (мураббийни назарда тутмоқда) Премьер-лиганинг учинчи ва тўртинчи ўйинлари ўтказилмагунча футболчиларни қўйиб юбормаслигини айтди. Қандай қилиб ФИФА кунларида миллий чемпионат ўйинини ўтказиш мумкин?

Ўзбекистон Осиёда футбол марказига айланиб бормоқда. Буни турли мусобақаларда, ҳар хил ёш тоифасидаги футболчилар исботлаб келмоқда.