АПЛда “кетмони учмаган” юлдузлар

Англия Премьер-лигаси мухлислар кўз олдида мукаммал чемпионатга айланиши ўз-ўзидан бўлмаган. Бу лиганинг атмосфераси шу қадар кучлики, у баъзида жаҳоннинг энг кучли футболчилари қаторида тилга олинган юлдузлар учун ҳам оғирлик қилган. Балки, шунинг учун ҳам, уларнинг баъзилари АПЛда тўп сурганини сезмай ҳам қолгандирмиз. Келинг, шу хусусида сўз юритамиз.

1. Диего Форлан
Премьер-лига клуби: “Манчестер Юнайтед”
Ўйинлар сони: 63 та

Ушбу рўйхатни бошлаб бериш учун Форландан ҳам кучлироқ футболчини топиб бера оласизми? Ҳа, у “қизил иблислар” сафидаги илк голини уриш учун 24 та учрашувда майдонга тушишга мажбур бўлди. Манчестерликлар таркибида ундан ҳам кўпроқ меҳнат қилиб, гол ура олмай кетганлар бор. Аммо дунё юлдузи Форланнинг бу клубда “нон тополмай” кетиши барчани ажаблантирган. Мураббийни айблашга эса ҳеч қандай асос йўқ: Сэр Алекс Фергюсон футболчилар билан индивидуал ишлаш бўйича футбол тарихидаги энг кучли мутахассислардан бири эди. “Олд Траффорд”даги фаолиятини 10 та гол билан якунлашга мажбур бўлган уругвайлик футболчи клуб мухлислари қалбида 2002 йил декабрида “Ливерпуль” постига йўллаган дубли орқалигина қолган бўлса, ажаб эмас.

Аммо, у 2004 йилда “Вильярреал” сафига ўтар экан, жуда яхши формада эди. “Сариқ сувости кемаси” либосида 121 та ўйинда майдонга тушган футболчи 58 та гол уришга муваффақ бўлган. Сўнгра, Диегони Испаниянинг янги шаклланиб бораётган суперклуби “Атлетико” ўзига жалб этади. “Матрасчилар” таркибида у 198 та беллашувда 96 маротаба гол уришга муваффақ бўлади. Европа Лигасининг 2010 йилги финалида киритилган дубль унинг мадридликлар қалбидан абадий ўрин олишини таъминлайди.

NINTCHDBPICT000003018934-e1565195865600

2. Андрей Шевченко
Премьер-лига клуби: “Челси”
Ўйинлар сони: 48 та

Шевченко 2006 йилда “Милан”дан 30,8 миллион евро эвазига харид қилинар экан, “Стэмфорд Бридж” тарафларда катта байрам бошланди. Жамоа мухлислари унинг трансфери ортидан суюклиларининг янада юқорироққа парвоз қилишини орзу қила бошлашди. Афсуски, Украина футболи афсонаси 2009 йилда АПЛда урилган 9 та голи билан “Челси”ни боши эгик ҳолда тарк этишга мажбур бўлган. Бу ўша сиз ва биз билган, “Милан” сафида 175 та гол урган, “Барселона” дарвозасига биринчи таймдаёқ хет-трик қайд этган, 2004 йилда “Олтин тўп”ни ютган Шевченко эди. АПЛда у ўртамиёнадан ҳам пастроқ даражада ўйин кўрсатган.

shevchenko

3. Анхель Ди Мария
Премьер-лига клуби: “Манчестер Юнайтед”
Ўйинлар сони: 27 та

Анхель, шунчаки, 1 йил вақтини Манчестерда беҳуда ўтказиб кетган. Дастлабки 5 учрашувда 3 та гол ва шунча ассист амалга ошириб, рекорд ўрнатган Премьер-лиганинг энг қиммат футболчиси (2014) кейинроқ ҳеч қанақасига манкунианларга ёрдам бера олмади. Кейинги ёздаёқ клуб уни 15 миллион зарарига бўлса-да, ПСЖга сотиб юборади.

Бироқ, унинг фаолияти юқоридаги 2 футболчи каби омадсиз кечмади. Ўша мавсум фақат Санти Касорла ва Фабрега ундан (10 та) кўпроқ ассистга эга эди. 

Парижликлар сафига бориб қўшилгач, аргентиналикнинг яна аввалгидек яхши ўйнай бошлагани кўп нарса АПЛ даражасига боғлиқ, деган фикрларни уйғотди.

manchester-uniteds-most-expensive-transfers-of-all-time-angel-di-maria_dt1382za9mtc1fsx401cbz0rdnpng

4. Хуан Себастьян Верон
Премьер-лига клуби: “Манчестер Юнайтед”, “Челси”
Ўйинлар сони: 58 та

Сэр Алекс Фергюсоннинг баъзи харидларини тушуниш қийин. У кутилмаган қарорлари билан ҳам футбол оламида катта обрў топган. Унинг таваккал ва ноодатий қарорлари нафақат “қизил иблислар”га, балки бутун футболга фойда келтира олган. Хуан Себастьян Верон 28,1 миллион евро эвазига Манчестерга келган ва 2 йил ўтиб, 15 “лимон” билан “Челси”га кўчиб ўтади. Лотин Америкасидан юқори жисмоний тайёргарлиги эвазига олиб келинган ярим ҳимоячи АПЛда ўзини йўқотиб қўйди.

“Ферги бобо”нинг ўзи ҳам бу ҳолат ҳақида: “Верон жуда иқтидорли футболчи, аммо у биз кутган ўйинни намойиш эта олмаяпти. Премьер-лига унга оғирлик қилмоқда”, - деган эди.

0_GettyImages-2346585

5. Паулиньо
Премьер-лига клуби: “Тоттенхэм”
Ўйинлар сони: 45 та

Паулиньо 2013 йилда Бэйлнинг “Реал”га ўтишидан келиб тушган пуллар эвазига “Уайт Харт Лэйн”га кўчиб келган. Аммо у захира ўриндиғини ўзига макон қилиб олади. У мутлақо омадсиз тарзда ҳаракат қилди, деб айтишдан йироқмиз. Шунчаки, ўша пайтларда “шпорлар” ярим ҳимоясида жуда кучли футболчилар йиғилганди. Бразилиялик эса узоқ кутишни истамади.

Хитойга бориб келгач ҳам, “Барселона”да қандай ўйин намойиш этганини кўрдик. АПЛ “балоси”нинг яна бир найранги!

1519033164_584672_1519034544_noticia_normal

6. Яго Аспас
Премьер-лига клуби: “Ливерпуль”
Ўйинлар сони: 14 та

Ҳа, Аспас “Ливерпуль”да ўйнаган. Балки, сиз буни биларсиз. Лекин жуда кўпчилик футбол ихлосмандлари учун бу сезилмай қолган бир давр. 2013-2015 йиллар давомида 14 тагина ўйинда майдонга тушган испанияликни сезиш учун имконимиз ҳам камроқ бўлган.

Бугун “Сельта”да 150 дан ошиқ гол урган, Испания терма жамоасида ҳам 18 та беллашувда ўйнаб улгурган (6 та гол). Уни Вигода қаҳрамон, деб билишади. АПЛда эса эсламайдилар ҳам.

spt_ai_liverpool_chelsea_86-e1556879278853

7. Мемфис Депай
Премьер-лига клуби: “Манчестер Юнайтед”
Ўйинлар сони: 33 та

Луи ван Гал даврида харид қилинган “Манчестер Юнайтед”нинг навбатдаги хариди мухлислар томонидан умид билан кутиб олинганди. Унинг мавсум аввалидаги назорат ўйинларида кўрсатган футболи кутилганидек чиқди. Аммо Премьер-лига яна ўзининг бошқа даражада эканини кўрсатиб қўйди. Атиги 21 ёшдаги Мэмфис Депай бу лигадаги юқори босимга дош бера олмади ва жароҳатларга ўралашиб қолди. Кетма-кет лазаретга бориб-келавергач, футболчи Францияга кетишга қарор қилди. Бу унинг шахсий фаолияти учун тўғри қарор бўлганини футболчига “Барселона” томонидан қизиқиш бўлаётгани ҳам кўрсатиб турибди.

498159138.jpg

8. Стефан Савич
Премьер-лига клуби: “Манчестер Сити”
Ўйинлар сони: 11 та

Стефан Савич АПЛда ўйнаб кета олмаслигини тушуниши учун 1 мавсум етарли бўлди. 6 миллион евро эвазига “шаҳарлик”ка айланган черногориялик футболчининг кетишидан клуб мутасаддилари ҳам у қадар ранжимади. Чунки, у клубнинг навбатдаги омадсиз хариди Матиа Настасичнинг трансфери учун қисм вазифасини ўтаб, “Фиорентина”га йўл олганди.

Келгусида унинг “Атлетико”даги фаолияти қанчалик ёрқин чиққанидан хабардорсиз. Нега энди ўша даврларда ҳам марказий ҳимоясида муаммоси бўлган “Сити”да у ўйнаб кета олмади? Қизиқ…

ZZZZsavic-scaled

9. Радамель Фалькао
Премьер-лига клуби: “Манчестер Юнайтед”, “Челси”
Ўйинлар сони: 36 та

Сиз азиз мухлисларга Фалькао Европанинг энг хавфли ҳужумчиларидан бири бўлганини эслатиб ўтишга ҳожат йўқ, назаримда. У “Порту” ва “Атлетико” сафида нималарга қодир эканлигини исботлаб бўлган. Бироқ, колумбиялик футболчини ҳам Премьер-лиганинг сирли таъсири енгиб қўйган. “Манчестер Юнайтед” таркибига мутлақо кутилмаган пайтда келиб қўшилган форварднинг кўрсатган ўйини янада ҳайратланарли чиқди. Манчестерликлар либоси юксак масъулият юклашини иддао қилишингиз мумкин. Аммо у ўзини “Челси”да ҳам кўрсатиши мумкин эди. Лондонда ҳам “бири икки бўлмагач”, Радамель яна “Монако”га қайтиб кетади.

football-manchester-uniteds-radamel-falcao6

Абдулвосид Валихонов тайёрлади

Матнда хатолик топсангиз, ўша хатони белгилаб, бизга жўнатинг (Ctrl + Enter)