Асад Дўрмонов: Футболчилар қайси клубда ўйнаётганини тушунишлари керак, "Нефтчи" ўз олдига максимал вазифа қўядиган жамоа

Бир пайтлар чемпионатимизда “Нефтчи” деган кучли, совриндор жамоамиз бўларди-а? Афсуски, йиллар ўтиб бу клуб ўз мавқеини йўқотди, кучлилар орасини тарк этди. Аммо қачондир фарғоналиклар яна ўз жойига қайтиши керак. Про-лигада иштирок этаётган бугунги “Нефтчи” қандай ҳолатда? Клуб қачон Суперлигага қайтади? Шу мақсадда жамоа бош мураббийи Асад Дўрмонов билан мухлисларни қизиқтираётган масалалар бўйича суҳбатлашдик.

- Бу йилги про-лига қандай ўтяпти? У ерда ишлаётган мураббий сифатида чемпионатнинг нуфузи ҳақида нима деган бўлардингиз?

- Про-лигада ўтган йилдан бери 8 та жамоа қатнашяптими, тўғрими? Аммо неча даврали бўларкин, билмадим. Лекин бу ердаги ўйинлар анча муросасиз кечяпти, ҳар бир учрашув худди финалдек ўтяпти. Тайёргарликлар ҳам бошқача кечяпти. Хато қилиш керак эмас. Чунки ўйинлар сони камроқ ва бундай вазиятда йўқотиладиган очколар қимматга тушиши аниқ. Яна нима дейишим мумкин? Тўғри, пандемия туфайли икки марта рестарт бўлди. Бундай ҳолатга биринчи бор дуч келдик, барчамиз. Олдин эса ҳаммаси режа бўйича кетарди, мавсум бошида ким билан қачон ўйнашимизни билардик. Энди эса ўзгаришлар бўлиб турибди. Футболчиларга ҳам қийин. Бошида карантин туфайли тўхтатилди, кейин яна ўйинлар бошланиб, Кубок баҳси билан бешта ўйин ўтказиб, йигитлар спорт формасига кириб бораётганида яна бир бор тўхтатилди. Нима ҳам дердик, бу форс-мажор. Бу айнан бизда бўлаётган ҳолат эмас, бутун дунёда шунақа. Мана, чемпионатни яна бошладик. Энди мавсумни бир амаллаб тугатиб олишимиз лозим. Қийинчилик билан ҳаммаси яхши бўлади.

- “Нефтчи” таркибида қандай ўзгаришлар бўлгани ҳақида етарли маълумотларга эга бўла олмадик. Лекин Мансур Саидов, Павел Смоляченко каби собиқ ўйинчилар қайтгани ҳақида эшитдик. Жамоангиздаги ўзгаришлар хусусида тўхталиб ўтсангиз.

- Таркибни кучайтиришга ҳаракат қилдик. Ҳар бир мураббийга жамоаси кучли бўлиб, захираси узун бўлса, янада яхши. Жамоамизга Мансур Саидов ва Павел Смоляченкони чақирдик. Кўряпмиз, чемпионатда қанча ўйинлар бўлади, қанча давом этади...шунга қараб маҳоратли футболчиларни жалб қилдик. Улар тажрибаси билан ёрдам беришади. Ўзлари ҳам “Нефтчи”дан чиқишган, ҳаммасини яхши тушунишади. Албатта, бизга ёрдам беришади.

- Мансур Саидов футболчилик фаолиятини тугатган деб ўйлагандик. Унинг “Нефтчи”га қайтарилиши сизнинг ташаббусингизмиди, яъни, клуб унга мухтожлик сездими?

- Биламан, Мансурнинг ўйинчи сифатида “Нефтчи”га фойдаси тегади. Майдонда бир тайм ўйнайдими ёки тўлиқми, барибир катта тажрибаси бор. Унда ғолиблик руҳи яхши шаклланган. Жамоадошларига йўл-йўриқлар кўрсатиб, руҳлантириб туради. Мана шундай томонлари билан ҳам ёрдам беради. Смолченко “Нефтчи”нинг ўринбосарларидан чиққан бола. Шу ерда ўйнади, кейин у ерга, бу ерга кетди. Йигитларга доим тушунтираман, футболда фамилия ўйнамайди, майдонда фақат ўйинчи ўйнайди. Шу боис уларга ёрдам беринглар, дедим. Про-лигада ҳам қаттиқ ўйинлар бўлади, чинакамига жанг кечади. Мана шу томонларини ўйлаб ушбу футболчиларни чақирдик.

- “Нефтчи” про-лигага тушиб кетгач, доим ўз олдига яна Суперлигага қайтиш вазифасини қўйяпти. Бироқ вазифани бажара олмаяпти, нимадир етишмаётгандек...

- Вақт керак. 2018 йили қуйи лигага тушиб кетгач, жамоадаги футболчилар тарқаб кетди. Янги таркиб тузилгач, натижа бўладими-йўқми, бунга вақт керак бўлади. Ўтган йили ҳам йигитлар курашишди, аммо ўхшамади. Демак, тажриба етишмади. Бу йил футболчиларимиз нима учун курашишаётганини, қандай масъулият борлигини яхшироқ тушунишяпти. “Нефтчи”да шундайки, ҳамиша максимал вазифа қўйилади. Бу расмий ўйин бўладими ёки ўртоқлик учрашувими, фарқи йўқ, эскитдан клуб фақат максимал вазифа учун курашиб келади. Жамоамиз қандай мақсад учун курашаётган бўлса, бу йўлда охиригача ҳаракат қиламиз. Якуни эса биз учун яхши бўлади деб умид қиламан.

- “Нефтчи”нинг тарихи катта. Ўзингиз бошидан шу ерда ўйнаб катта бўлдингиз, ҳаммасини яхши биласиз. Илгари рақиблар қўрқиб туришарди...

- Ҳамма нарса ўзгариб кетди. Футболчиликни тугатганимга 15-20 йил бўляпти. Мана, янгидан-янги клублар чиқяпти. Ўша тарихни эслаб ўтиравермаймиз-ку. Ҳозирги ҳаёт билан яшашимиз керак. Футболчилар бошқа, тайёргарликлар бошқа. Руҳият ҳам ўзгарган. Шунга қараб интилиш керак.

- Айтмоқчиманки, “Нефтчи”ни ипидан-игнасигача яхши биласиз. Клубнинг мавқеини тиклаш йўлида барибир сиз бошқалардан кўра, нима қилиш кераклигини тушунасиз. Шу томонлама ўзингизнинг қарашларингиз, режаларингиз қандай?

- Менимча, биринчи ўринда футболчилар қайси клубда ўйнашаётганини тушунишлари керак. Бу руҳият билан боғлиқ. Боя айтдим, “Нефтчи” ҳамма вақт максимал мақсад учун курашадиган жамоа. Ўйинчилар эса бунга тайёр бўлишлари лозим. Аввало руҳий томондан кучли бўлса, ҳаммаси яхши бўлади.

- Фарғонанинг “Истиқлол” жамоасини мусобақадан чиқиб кетиши чемпионатга қанчалик таъсир қилади деб ўйлайсиз?

- Энди битта жамоа кам бўлади. Нима десам бўлади, қайси томондан яхши ёки ёмон бўлади, очиғи билмадим. Шунақа бўлиб қолди-да, бу ўзларининг муаммоси. Мен ҳеч нима дея олмайман. Яхшиси, ўзимнинг жамоам ҳақида қайғурганим яхши.

- Суперлигада водийдан “Андижон”, “Навбаҳор” ва “Қўқон-1912” клублари бор-у, аммо Фарғонадан ҳеч ким йўқ. Про-лигада эса ушбу вилоятдан “Нефтчи” билан “Турон” етакчиликка даъвогарлик қилишяпти. Аммо Суперлигада Фарғонадан ҳеч бир жамоанинг йўқлиги сизни ранжитмаяптими?

- (Кулади) 2018 йили тушиб кетдик. Демак, шунақа бўлиши керак эди. Аммо биз албатта қайтамиз. Бунинг учун тайёр бўлиш, вазифа қўйилиши керак. Суперлигада икки йилдан бери ўйнамаяпмиз. Ўтган вақт давомида у ерда ҳам ўзгаришлар бўляпти. Янгиликларга қўл уриляпти. Шунинг учун Суперлигага ҳар тарафлама тайёр бўлиш лозим. Агар Суперлигага чиқиб, яна шу заҳоти тушиб кетса ҳам бўлмайди. Чиқдингми, бўлди, ўз ўрнингни топиб, барқарор ўйнаш лозим. Асосийси, жамоа тайёр бўлиши талаб этилади.

- Бундан чиқди, “Нефтчи”га ҳали вақт бор деб ўйлайсизми?

- Йўқ, бундай эмас. Айтдим-ку, биз ҳамиша олдимизга максимал вазифалар қўямиз. Айтмоқчиманки, Суперлигага чиқиб, яна тезда тушиб кетмаслиги керак. Шу боис жамоани пухта тайёрлаш даркор.

- “Нефтчи”да молиявий томондан аҳвол қандай?

- Молиявий масала бўйича ҳеч нима демайман. Ҳаракат қиляпмиз, ҳаммаси яхши бўлади.

- Жамоа учун қайғураётган фарғоналик мухлисларга қандай гапингиз бор?

- Яхши ўйнасангиз қарсаклар чалишади, ёмон ўйнасангиз аксинча. Футбол шунақа ўйин. Барибир ишқибоз дегани яхши кунида ҳам, ёмон кунида ҳам жамоасининг ёнида бўлиши керак. Мухлисларни шундай тушунаман.

- Юрий Саркисян билан ҳам гаплашиб турибсизми?

- Анчадан бери гаплашмадим. Лекин байрам кунларида табриклаб тураман.