“Барса” 7 йиллик шартномага эга юлдузни келган жойига қайтариб юборади

“Барселона” 2024 йилнинг бошида Бразилиядан Витор Рокени трансфер қилган. Бу ўйинчи учун каталонияликлар “Атлетико Паранаэнсе” жамоасига 30 миллион евро тўлаган ва  Роке билан 2031 йилнинг ярмигача давом этадиган шартнома имзолаган эди.  

Ёш истеъдод эгаси Каталонияга келиши билан асосий таркибга киришда муаммога дуч келди. Ёзда клуб уни “Бетис”га ижарага бериб юборди.

19 ёшли футболчининг севильяликлар таркибидаги сермаҳсуллиги ҳам кутилган даражада эмас. Барча турнирларда 23 та учрашувда майдонга тушган ҳужумчи олтита гол ва битта ассист қайд этди.

Каталонияликлар Витор Рокени Бразилияга қайтариб юбориш борасида бош қотиряпти. Ушбу мамлакатнинг етакчи жамоаларидан бири “Палмейрас” Витор Роке учун 20 миллион евро тўлашга тайёр.

“Барселона” ўйинчини қўйиб юборишни муаммо қилмайди. Лекин “Бетис”да Витор Рокени биринчи бўлиб трансфер қилиш ҳуқуқи бор. Айнан мана шу омил “Палмейрас” режасини амалга оширишга халақит қилиши мумкин.