"Барса" Альварес бўйича якуний қарорини айтди

Испаниянинг машҳур клуби "Барселона" аргентиналик ҳужумчи Хулиан Альваресни сотиб олиш режасидан воз кечди. Бу ҳақда каталонияликлар спорт директори Деку маълум қилди.

Альварес ҳозирда Мадриднинг "Атлетико" жамоаси шарафини ҳимоя қилади. У аввалроқ омма олдида клубни тарк этиш истагини билдирган эди, гарчи "матрасчилар" билан тузган шартномаси 2030 йилгача амал қилса ҳам. Испания оммавий ахборот воситалари маълумотига кўра, "Барселона" футболчи учун 130 миллион евро таклиф қилишга тайёр эди.

Шундан сўнг "Атлетико" раҳбарияти Альвареснинг Каталония клубига ўтиши эҳтимоли "нолга тенг" эканини таъкидлаганди.

Декунинг сўзларига кўра, "Барселона" бу мавзуни ёпилган деб ҳисоблайди.

"Хулиан Альварес эндиликда бизнинг ўтмишда қолди. Биз олдинга қарашимиз керак ва ҳозирги таркибимиздан мамнунмиз. Унинг ҳам ишлари яхши бўлишини, ўз клубига ёрдам бераётганини истайман. Кўплаб келишувлар, кўплаб трансферлар турли сабабларга кўра амалга ошмайди", — дея Декудан иқтибос келтиради журналист Фабрицио Романо "X" ижтимоий тармоғида.

26 ёшли Альварес жорий мавсумда "Атлетико" таркибидаги саккиз ўйиндан тўрттасида майдонга тушган. Аргентина терма жамоаси сафида 58 ўйин ўтказиб, 15 гол урган.

У 2022 йилда жаҳон чемпиони бўлган Аргентина термаси таркибида тўп сурган, шунингдек, 2021 ва 2024 йилларда Америка Кубоги ғолиблигини қўлга киритган. 2026 йилда ўтказилган жаҳон чемпионатида ҳам терма жамоа билан финалгача етиб борган, аммо ҳал қилувчи баҳсда Испанияга қўшимча дақиқаларда 0:1 ҳисобида мағлуб бўлган.