“Барса”да катта йўқотиш

Испания чемпионлиги унвонини сақлаб қолиш учун курашаётган “Барселона” катта йўқотишга дуч келди. Жамоа етакчиларидан Френки де Йонг жароҳат сабаб беш-олти ҳафта давомида жамоа таркибида ўйнай олмайди.

Бу ҳақда клуб матбуот хизмати X ижтимоий тармоғида хабар қилди.

- Асосий таркиб футболчиси Френки де Йонг машғулот вақтида ўнг оёғининг икки бошли мушаги дистал қисми жароҳатланди. Текширувлар унинг тикланиш даври беш-олти ҳафтани ташкил этишини тасдиқлади, - дейилади “Барселона” баёнотида.

Жорий мавсумда ярим ҳимоячи барча мусобақаларда 31 та ўйинда иштирок этиб, бир гол ва еттита голли узатмага муаллифлик қилган.

Футболчининг клуб билан амалдаги шартномаси 2029 йил ёзигача мўлжалланган. Transfermarkt портали маълумотига кўра, футболчининг бозор қиймати 45 млн еврони ташкил қилади.