"Барселона" ортга чекинмоқчи эмас

Бильбаонинг "Атлетик" клуби ва Испания терма жамоасининг ҳужумкор ярим ҳимоячиси Нико Уильямс ҳали ҳам "Барселона"нинг қизиқишлар доирасида бўлиб турибди. Бу ҳақда El Chringuito нашри хабар бермоқда.

Манбага кўра, "кўк-анорранглилар" Уильямсни жорий ёзги трансфер ойнасидаёқ қўлга киритишга ҳаракат қилиб кўрган, бироқ бу амалга ошмагач футболчи басклар жамоасида қолди. Каталонияликлар барибир ўз мақсадидан чекинмоқчи эмас ва шу сабабли Нико "Барселона"нинг келаси ёз учун асосий трансфер мақсади ҳисобланади.

Испания чемпионатининг жорий мавсумида вингер 11 та ўйин ўтказиб, битта гол ва битта голли узатмага муаллифлик қилди. Нико ва "Атлетик" ўртасидаги амалдаги меҳнат шартномаси 2027 йилнинг ёзига қадар имзоланган. 22 ёшли испаниялик футболчининг трансфер қиймати 70 миллион еврога баҳоланмоқда.