Бензема Европанинг энг қудратли клубига ўтиш ҳаракатини бошлади

Франциялик ҳужумчи Карим Бензема Саудия Арабистонининг “Ал-Иттиҳод” клуби билан келишмовчилик фонида Мадриднинг “Реал” жамоасига қайтиш имкониятини кўриб чиқмоқда.

Бу ҳақда Fichajes нашри  хабар берди.

Манба маълумотига кўра, футболчи клуб раҳбариятини шу ҳақда огоҳлантирган. Бензема шайхлар унга ҳам  “Ал-Наср” ҳужумчиси Криштиану Роналдуникига яқин шартларда шартнома таклиф қилмагунича майдонга тушмоқчи эмас. Гап бир мавсум учун тахминан 180 миллион евро атрофидаги маош ҳақида кетмоқда.

Таъкидланишича, “Ал-Иттиҳод” бундай молиявий талабларни бажаришга тайёр эмас ва франциялик ҳужумчи билан шартномани узайтиришни режалаштирмаяпти. Бенземанинг амалдаги шартномаси 2026 йилнинг 30 июнигача мўлжалланган.

Юзага келган вазият фонида футболчининг агенти “Қироллик клуби” билан алоқаларни фаоллаштирган. Манбага кўра, жорий мавсум охиригача мўлжалланган қисқа муддатли шартнома варианти кўриб чиқилмоқда. Испан клубининг спорт раҳбарияти эса бундай қадамнинг турнир вазифалари, молиявий шартлар ва таркибга таъсирини таҳлил қилмоқда.