Бобир Абдухолиқов "Рух" сафида бронза медалини қўлга киритди (видео)

Бугун Украина U21 чемпионатида 25-тур ўйинлари бўлиб ўтди. Бобир Абдухолиқов фаолият олиб борадиган "Рух" жамоаси ўз майдонида "Олимпик" Донецк клубини қабул қилди ва 4:1 ҳисобидаги йирик ғалабани қўлга киритди.

Ҳамюртимиз учрашувни асосий таркибда бошлади ва 88-дақиқада захирага олинди. Бунга қадар у жамоаси фойдасига пенальти "ишлаган" ва ҳакам томонидан огоҳлантирилган эди.

Бугунги ғалабадан сўнг "сариқ-қоралар" ҳисобидаги очколар сони 51 тага етди ва жамоа чемпионат якунига бир тур қолганида бронза медалларини нақд қилди. Сўнгги тур олдидан 2-ўриндаги "Шахтёр" билан орадаги фарқ 8 тани, 4-поғонадаги "Олександрия" билан тафоввут эса 4 очкони ташкил қилди.

Шу тариқа, "Рух" 2020/21 йилги мавсум Украина U21 Биринчилигининг бронза медалларига эга чиқди.