Бўлди, бош мураббийликдан кетаман!

Англия Премьер-лигасида барқарор иштирок этаётган “Борнмут” жамоаси бош мураббийи Андони Ираола мавсум якунланиши билан лавозимини тарк этадиган бўлди.

Испаниялик мутахассиснинг кетишини “Борнмут” футбол клуби раҳбарияти ҳам тасдиқлади. Шу тариқа, унинг клубдаги уч йиллик фаолияти якунланади.

Ираола тайинланганидан бери клуб Англия Премьер-лигасида барқарор иштирок этиб келди, 2024-2025 йилги мавсумда 56 очко тўплаб, 9-ўринни эгаллаган ҳолда ўз тарихида рекорд натижа қайд этди.

Ираола 2023 йилнинг 1 июлида жамоа бош мураббийига айланган эди. Унинг шартномаси 2026 йилнинг 30 июнигача амал қилади.

-  Мен учун “Борнмут”ни бошқариш шараф бўлди, биргаликда эришган ютуқларимиздан фахрланаман. Мен билан ишлаган ўйинчилар ва штабдан миннатдорман.

Мухлисларга келсак, сизлар мен ва жамоага ажойиб қўллаб-қувватлаш кўрсатдингиз, бунинг учун доим миннатдор бўламан.

Менимча, кетиш учун айни вақт, лекин бу клуб ҳақида доимо ажойиб хотираларим сақланиб қолади, - деди Андони Ираола.

Таъкидлаш жоизки, Андони Ираола айнан “Борнмут”даги фаолиятидан кейин қитъанинг йирик клублари эътиборини қозонди ва ҳозирнинг ўзида унга янги таклифлар бор.