Braziliyalik futbolchi devor tagida qolib, halok bo‘ldi

«Botafogo» klubining sobiq hujumchisi Tassio Rio-de-Janeyro shahrining Santa-Tereza tumanida ustiga devor qulashi oqibatida halok bo‘ldi.

Hodisaga kuchli bo‘ronli shamol sabab bo‘lgani aytilmoqda. Fojea paytida Tassio bilan birga uning do‘sti Vandre Kordeyro ham vafot etdi.

Ijtimoiy tarmoqlarda tarqalgan videolarda devor ikki erkak va yaqinida turgan avtomobil ustiga ag‘darilib tushgani ko‘rinib turadi. Shu paytda ularning yonidan yana to‘rt kishi, jumladan kamida bir bola o‘tib ketayotgani aks etgan. Ular vaqtliroq chetga chiqib, omon qolgan.

Tassio 2002 yildan 2019 yilgacha professional futbolda to‘p surgan. U 2015 yilda «Botafogo» safiga o‘tgach, kengroq tanilgan: klub tarkibida olti o‘yinda maydonga tushib, bir gol urgan. «Botafogo» sobiq futbolchisining vafoti munosabati bilan rasmiy ravishda ta’ziya bildirdi.

Futbolchilik faoliyatini yakunlagach, Tassio Mansão Alvite Santa Teresa banket majmuasida ishlayotgan edi. Devor aynan shu majmua yaqinida qulagan.

Braziliya favqulodda holatlar xizmatlari ma’lumotlariga ko‘ra, kuchli shamol Rio-de-Janeyro shtati bo‘ylab o‘nlab turli ko‘ngilsiz hodisalarga sabab bo‘lgan.