Бугун Рюдигер Холандни "чўнтагига солиб қўйди"

"Реал" ва "Манчестер Сити" тўқнашувининг дастлабки ўйинида кучлар тенг келди. Мазкур баҳсда 6 марта дарвозалар ишғол қилинган бўлишига қарамай, турнир тўпурари Эрлинг Холанд битта ҳам голда иштирок эта олмади. 

Ҳужумчи ўйин давомида 20 бора тўпга тегиниб, шерикларига 6 та аниқ пас бера олди. Шунингдек, мезбонлар дарвозаси томон битта зарба йўллади. Карло Анчелотти норвегиялик футболчини қўриқлашни Антони Рюдигерга топширган ва бу ишни ҳимоячи уддалай олди. 

Бир ҳафтадан сўнг жамоалар "Этихад"да яна учрашишади. Ушбу баҳс олдидан эса "Реал" "Мальорка", "Сити" "Лутон"га қарши ўйин ўтказади.