Бугун Суперлигада битта жамоанинг тақдири ойдинлашиши мумкин

Бугун Суперлига 25-тур баҳслари бўлиб ўтади. Турнинг барча ўйинлари бир кунга белгиланган.

Дастлаб лигада қолиб учун курашаётган, кейин эса чемпионлик йўлида беллашаётганлар иштирокидаги учрашувлар ўтказилади. Биз ушбу турда жамоаларнинг имкониятлари қандайлиги борасида фикр юритамиз.

“Сурхон” – “Динамо”

Термизликлар жамоасида бош мураббий ўзгаргач, натижаларда ҳам ўзгаришлар кўрина бошлади. Айни пайтга келиб “Сурхон” хавфдан узоқда эмас. Лекин жамоа аввалгидек қўрқув билан юрмайди. Чунки “Сурхон” битта ғалабага эришса, Суперлигада қолишни уддалайди. Уларнинг бахтига рақиб – “Динамо”. Самарқандликлар аллақачон Про лигага равона бўлган. Кайфияти анчагина тушиб кетган ва мавсумда бир бор зафар қучган “Динамо”ни “Сурхон”га қаршилик кўрсатиши қийинроқ, назаримизда. Термизликлар бу ўйинда катта қийинчиликка учрамасдан 3 очкога эга чиқиши мумкин.

Имкониятлар: 70% - 30%

“Қўқон-1912” – “Бунёдкор”

Иван Бошкович “Бунёдкор”нинг нафақат натижаларига, балки ўйинига ҳам таъсир ўтказди. “Қалдирғочлар”нинг ўйинида қандайдир сир йўқ аслида. Аммо Бошкович тўхтаб қолган ёшларни яна уйғота олди ва курашишга мажбур қиляпти. У шундай қайсар мураббийки, унинг услубига мослашиш рақибга осон бўлмаяпти. Буни “Навбаҳор”, “Насаф” ва “Сурхон”га қарши беллашувларда кўрдик. Энди тошкентликлар “Қўқон-1912”га яхшигина кураш таклиф қилади. Интилиш эвазига пойтахтликлар рақибдан бироз устундек.

Даврон Файзиев шогирдлари жуда қийин аҳволда. Уларни ҳар дам Про лига таъқиб қиляпти. Жамоа учун мавсумдаги энг муҳим 2 та учрашув. Агар “шунқорлар” бу баҳсларда ғалаба қозонишни уддаласа, балки мухлислар мавсум давомидаги муваффақиятсизликлар учун кечириб юборар. Аммо бу осон бўлмайди. Чунки ўша икки рақибдан бири – “Бунёдкор”.

Имкониятлар: 45% - 55%

АГМК – “Олимпик”

Бу ўйинда имкониятларни чамалаш қийин. Чунки жамоалар мавсум давомида бир хил темпда ўйин намойиш этмади. Аммо ҳозирги келиб улар формага қайтди. Олмалиқликлар 4-ўринга жойлашиб олди, тошкентликлар бой берган ўринларига кўтарилмоқда. Икки жамоа ҳам ўсишга эришди.

Миржалол Қосимов шогирдларида тартибли ўйин ва ҳимояга асосланган услуб нисбатан яхшироқ. “Олимпик”да жамоавий ўйин шаклланяпти, футболчиларнинг ўзига бўлган ишонч кучайган. Аммо номлардан келиб чиқса, устунлик қисман АГМК томонида.

Имкониятлар: 51% - 49%

“Сўғдиёна” – “Локомотив”

Жиззахликлар 2 тур қолганда Улуғбек Бақоев билан хайрлашди. “Сўғдиёна” 3 фронтда кураш олиб борди ва барчасини қўлдан бой берди. Шунинг учун жамоа раҳбарияти мураббийга чиқиш эшикларини кўрсатгандир. Энди унинг ўрнига бошқа мутахассис мавсумни якунлаб қўяди.

Жамоанинг кайфияти ва жисмоний ҳолати кўнгилдагидек эмас. Лекин жиззахликлар охирги икки ойдаги салбий натижалар учун мухлисларга янги мураббий билан икки ўйинда ғалаба тақдим этишни мақсад қилгани аниқ.

“Локомотив”да ҳам рақибидан қолишмайдиган ҳолат. Аммо “темирйўлчилар” “жар ёқасида”. Яқин-яқингача, “Пахтакор”, “Насаф” билан курашиб юрган “Локо” энди лигада жой сақлаб қолиш ҳақида ўйламоқда. Жамоанинг курашишига иштиёқи ҳам қолмаяпти. Уларни фақатгина қандайдир сенсациялар қутқариши мумкин холос. Жамоанинг қўлидан ҳеч нарса келмаяпти. “Навбаҳор”га қарши учрашувда ҳимоядаги хатодан кейин ўтказиб юборилган голдан сўнг жамоа таслим бўлгандек майдонга йиқилди. Тушкун кайфият уларни қамраб олган.

Мазкур беллашувда дуранг ёки мезбонларнинг ғалабасини тахмин қилиш мумкин. Чунки “Локо”даги ҳолат футболчиларнинг вазиятлардан фойдаланишига салбий таъсир ўтказаётганини аввалги турда гувоҳи бўлдик.       

Имкониятлар: 50% - 50%

Бекзод ИСАЕВ