“Челси” афсонасини чорак аср ҳеч ким қилолмаган ишни уддалади

“Челси”нинг афсонавий футболчиси Фрэнк Лэмпард мураббийлик соҳасида катта натижа қайд этди. Бу мутахассис 25 йил давомида ҳеч ким Англия Премьер-лигасига олиб чиқолмаган “Ковентри Сити”ни юқори дивизионга йўлланма олишига катта ҳисса қўшди.

Фрэнк Лэмпард жамоаси сафарда “Блэкберн Роверс” билан 1:1 ҳисобида дуранг ўйнаб, юқори лигага кўтарилишни расмийлаштирди. Ҳал қилувчи гол 85-дақиқада урилди –Бобби Томас жарима зарбасидан узатилган тўпни бош билан дарвозага жойлаб, ҳисобни тенглаштирди.

Мезбонлар иккинчи таймда ҳисобни очди ва рақибнинг байрамини кечиктиришга яқин эди, бироқ “Ковентри” мағлубиятдан қутилиб қолиб, керакли очкони қўлга киритди.

Бу натижа Лэмпард жамоасига Премьер-лигага чиқишни кафолатлади, чунки учинчи ўриндаги “Миллуолл” энди пешқадамни қувиб ета олмайди. Ҳозирги вақтда Лэмпард жамоаси 86 очко билан биринчи ўринда турибди.

Шу тариқа, “Ковентри Сити” 2001 йилдан бери илк бор Англия футболи элит дивизионида иштирок этади ва 25 йиллик танаффусни якунлади.

Таъкидлаш жоиз, Фрэнк Лэмпард жамоани ўтган йили бошқарувга олган ва уни етакчилар қаторига олиб чиққан, энди эса тўғридан-тўғри юқори лигага чиқишга эришди.