Даҳшат! ПСЖ “Реал” сўраган юлдуз нархини айтди

“Реал” раҳбарияти анчадан бери “Пари Сен-Жермен” етакчиси Витиньянинг трансферига жиддий қизиқиш билдирмоқда. Мадридликлар португалиялик ўйинчи майдон марказидаги устунликни таъминлашда жамоадан кетган Тони Кроос ва Лука Модричнинг ўрнини боса олишига ишоняпти.

Cadena SER нашри маълумотларига кўра, “Қироллик клуби” Витинья трансфери бўйича музокараларни бошлашга тайёрланмоқда.

Футболчи ва парижликлар ўртасида келишувда бошқа клублар, хусусан “Реал” Витинья учун 100 миллион евро таклиф қилса, клуб ўйинчини қўйиб юбориши ҳақида банд бор.

Витинья 2022 йилда “Порту”дан ПСЖга 41 миллион евро эвазига ўтган эди. Унинг шартномаси 2029 йилнинг 30 июнигача амал қилади.

Жорий мавсумда моҳир футболчи парижликлар сафида барча мусобақаларда 35 та ўйинда қатнашиб, 6 та гол ва 10 та голли узатма муаллифи бўлди. Transfermarkt портали унинг бозор қийматини 110 миллион еврога баҳолаган.