Даврон Файзиев: "Ҳеч ким осонликча жон бермаяпти"

“Қўқон-1912” жамоаси про лиганинг 3-турида сафарда “Юниред”ни мағлуб этди. Ушбу беллашувдан кейин меҳмонлар бош мураббий Даврон Файзиев ўз таассуротлари билан ўртоқлашди.

Ўйин ҳақида

- Ўйинга ташриф буюрган барча мухлисларга раҳмат айтаман. Ўйин қизиқарли бўлди. «Юниред» жамоаси про-лигада ўз номига, курашувчанлик қобилиятига эга жамоа. Биз рақибнинг ўтган ўйинини ўрганиб чиққанимизда, улар «Динамо» билан бир хил ўйин кўрсатишганига гувоҳ бўлгандик. Шунга қараб бугун ҳам ўз режамизни туздик. Мақсад биринчи голни киритиб олиш эди ва бунга эришдик. Про-лигада ўткинчи ўйинлар қолмади. Барчаси қизиқарли ўйинлар бўлмоқда. Кеча ҳам жуда ажойиб ўйин бўлди. Про-лига анча ўсди. Биз эса ўз йўлимизда давом этамиз. Камчиликларимиз бор, уларни яхшилашга ҳаракат қиламиз. Энди «Насаф»га қарши Кубок ўйинига тайёрланамиз.

- Даврон ака, бир неча йилдан бери Ппро-лигада ишлаяпсиз. Ўртадаги тафовутни, фарқни қанчалик сездингиз?

- Мен фарқни эмас, про-лига кучайганини сездим. Қишки ўқув-йиғин машғулотларида бир неча ўртоқлик ўйинлари ўтказганимизда ва ўйинларни кўрганимда унчалик ҳам катта фарқ сезмадим. Ҳозир про-лигадаги барча жамоада Суперлигада ўйнаган футболчилар ўйнамоқда. Осонликча ҳеч ким жон бермаяпти. Мақсадга ҳар доим қийин йўлдан борилади. Биз бу йўлни раҳбарият билан енгиб ўтамиз, албатта.

- Даврон ака, водийда футболни жуда севишади. Сиз воҳа ва бошқа ҳудудларда ишлагансиз. «Қўқон-1912»да ҳомийлар, шарт-шароитлар борасида аҳвол қандай?

- Мен Самарқанд ёки «Локомотив»да ишлаганман. Улар билан солиштирса, бизда бироз пастроқ. Лекин ҳозир барча ишларимиз жой-жойида. Ҳомий масаласида менда аниқ маълумот йўқ, лекин ҳозирча шаҳар ҳокимияти бизга ёрдам бермоқда. Тез орада бизга асосий ҳомий бириктирилиши борасида айтишган, шуни кутиб турибмиз. Про-лиганинг аксарият жамоалари ўз ҳомийларига эга. Биз ҳам ўйлайманки, тез кунларда ҳомийларга эга бўламиз.

- Даврон ака, охирги ўйинларда учрашув тақдирини тажрибали футболчилар ҳал қилишмоқда. Бу про-лигада янги авлод чиқмаётгани билан боғлиқми ёки тажрибали футболчилар ўзларини про-лигада яхши ҳис қилишмоқдами?

- Тўғри айтиб ўтдингиз. Клубда ўз академияси бўлмаса, барибир тажрибали футболчиларга таянади, ёш футболчилар кам бўлади. Бунга қисман қўшиламан. Ҳозирда қўқонлик ёш футболчиларимиз бор. Энди уларни “пишириш” керак. Академия ва мусобақалар ўтказмаган футболчилар катта жамоаларда йўқолиб қолишади. Бошқа жамоаларда легионерлар кўп. Биз эса легионерлар билан мақтана олмаймиз. Жамоамиз тажрибали футболчилар ва ёшларга таянади. Йил бошида ҳам буни айтганмиз. Келгусида ёшларимизга ҳам ўйин амалиёти берилади ва янги номларга ҳам эга бўламиз.

Шунингдек, бугунги учрашувга қўллаб қувватлаш учун Қўқондан ташриф буюрган мухлисларимизга катта раҳмат айтаман.

“Қўқон-1912” матбуот хизмати.