Dembeleni Evropadan olib ketishadi

Fransiya milliy terma jamoasi va “Pari Sen-Jermen” klubi hujumchisi Usmon Dembele faoliyatini Saudiya Arabistoni chempionatida davom ettirishi mumkin.

Ariyadhiah nashri ma'lumotiga ko‘ra, Saudiyaning “Al-Hilol” klubi fransiyalik yulduz futbolchini sotib olish bo‘yicha rasmiy taklif yuborgan. Klub Dembeleni o‘zining navbatdagi superyulduz transferi sifatida ko‘rmoqda va bu kelishuvni 2023 yil yanvarda Krishtianu Ronalduning “An-Nasr”ga o‘tishidan keyingi Saudiya futbolining eng yirik transferlaridan biriga aylantirishni rejalashtirmoqda.

Dembelening PSJ bilan amaldagi shartnomasi 2028 yil iyunigacha mo‘ljallangan. Biroq yangi shartnoma bo‘yicha muzokaralar to‘xtab qolgan. Xabarlarga ko‘ra, klub prezidenti Nosir Al-Xelayfi jamoadagi maosh tizimini hatto asosiy futbolchilardan biri uchun ham o‘zgartirish niyatida emas.

Manbaning ta'kidlashicha, transfer muvaffaqiyatli amalga oshishi uchun saudiyaliklar futbolchi uchun 100 million evrodan ortiq mablag‘ taklif qilishlari kerak bo‘ladi. Maosh bilan birga umumiy shartnoma qiymati Dembeleni dunyodagi eng yuqori maosh oluvchi sportchilardan biriga aylantirishi mumkin.

Shuningdek, Dembele vakillari futbolchining kelajagi haqida jahon chempionati tugaguncha muzokara o‘tkazishni istamayapti. Biroq musobaqa yakunlangandan keyin vaziyat o‘zgarishi va muzokaralar yangi bosqichga chiqishi mumkin.

2025/2026 yilgi mavsumda Dembele PSJning asosiy futbolchilaridan biri bo‘lib, Parij klubining ichki va xalqaro maydondagi muvaffaqiyatlariga katta hissa qo‘shdi. Manbaga ko‘ra, uning Saudiya Arabistoniga ehtimoliy transferi so‘nggi yillarning eng shov-shuvli kelishuvlaridan biri bo‘lishi mumkin.