Дембелени Европадан олиб кетишади

Франция миллий терма жамоаси ва “Пари Сен-Жермен” клуби ҳужумчиси Усмон Дембеле фаолиятини Саудия Арабистони чемпионатида давом эттириши мумкин.

Ariyadhiah нашри маълумотига кўра, Саудиянинг “Ал-Ҳилол” клуби франциялик юлдуз футболчини сотиб олиш бўйича расмий таклиф юборган. Клуб Дембелени ўзининг навбатдаги суперюлдуз трансфери сифатида кўрмоқда ва бу келишувни 2023 йил январда Криштиану Роналдунинг “Ан-Наср”га ўтишидан кейинги Саудия футболининг энг йирик трансферларидан бирига айлантиришни режалаштирмоқда.

Дембеленинг ПСЖ билан амалдаги шартномаси 2028 йил июнигача мўлжалланган. Бироқ янги шартнома бўйича музокаралар тўхтаб қолган. Хабарларга кўра, клуб президенти Носир Ал-Хелайфи жамоадаги маош тизимини ҳатто асосий футболчилардан бири учун ҳам ўзгартириш ниятида эмас.

Манбанинг таъкидлашича, трансфер муваффақиятли амалга ошиши учун саудияликлар футболчи учун 100 миллион евродан ортиқ маблағ таклиф қилишлари керак бўлади. Маош билан бирга умумий шартнома қиймати Дембелени дунёдаги энг юқори маош олувчи спортчилардан бирига айлантириши мумкин.

Шунингдек, Дембеле вакиллари футболчининг келажаги ҳақида жаҳон чемпионати тугагунча музокара ўтказишни истамаяпти. Бироқ мусобақа якунланганидан кейин вазият ўзгариши ва музокаралар янги босқичга чиқиши мумкин.

2025/2026 йилги мавсумда Дембеле ПСЖнинг асосий футболчиларидан бири бўлиб, Париж клубининг ички ва халқаро майдондаги муваффақиятларига катта ҳисса қўшди. Манбага кўра, унинг Саудия Арабистонига эҳтимолий трансфери сўнгги йилларнинг энг шов-шувли келишувларидан бири бўлиши мумкин.