Элдор Шомуродов “Женоа”га қайтадими?

Мавсум бошида “Кальяри”га сотиб олиш ҳуқуқи билан ижарага ўтган Элдор Шомуродов орадан ярим йил ўтгач, жамоани тарк этиш ҳақида ўйламоқда. Кутилганидек ўйини чиқмаган ва асосий таркибдан жой ололмаган страйкернинг камига жароҳати ҳам бор. Шунингдек, 13 та учрашувда иштирок этган ҳужумчимиз икки мартагина бошланғич таркибдан жой олди. Мана шундай статистикадан кейин ҳар қандай жамоа футболчини қўйиб юборишга қаршилик қилмаган бўларди. Қишки трансферлар ойнасида Шомуродов Италиянинг бошқа клубига ўтишга ҳаракат қилиб кўради. “Sky Sports” нашри терма жамоамиз сардорига “Женоа” қизиқиш билдираётгани борасида хабар бермоқда. Айрим манбалар эса футболчининг агенти уни генуяликларга таклиф қилаётганини маълум қилди. Нима бўлганда ҳам Элдор яна ўзининг собиқ жамоасига қайтиши мумкин. Аммо бу трансфер амалга ошмай қолиш эҳтимоли ҳам йўқ эмас.

Ди Марцо “Женоа” қишки трансферлар ойнасида битта ҳужумчи билан шартнома имзоламоқчи эканлигини маълум қилди, лекин клубнинг энг асосий мақсади бу Шомуродов эмас, балки Мбай Ньянгдир. 2015 йилда франциялик футболчи Генуя жамоасида 6 ой ижара асосида ўйнаб кетган. Шундан кейин кўплаб клубларда фаолиятини давом эттирган Ньянг ўтган ёзда “Адана Демирспор”га ўтди. Орадан кўп ўтмай у яна А Серияга қайтмоқчи. Мавсумда 8 та гол уришга улгурган Мбайга “Женоа” аллақачон расмий таклиф билан чиқди. Энди ҳужумчининг сўнгги қарори кутилмоқда. Сабаби, Ньянгга “Верона” ва “Нант” клублари ҳам қизиқиш билдиряпти. Агарда ушбу трансфер амалга ошмай қолса, катта эҳтимол билан генуяликлар Элдор Шомуродов ёки Пьетро Пеллегри учун ҳаракатни бошлайди.

2001 йилда туғилган Пеллегри бўйича “Женоа” “Торино” билан боғланди. Аммо туринликлар страйкерни ижарага беришни эмас, балки сотишни ўйлаяпти. Ушбу мавсум 13 та учрашувда майдонга тушиб, битта ҳам гол ура олмаган футболчини “Эмполи” ҳам ўз таркибига қўшиб олмоқчи. У футболдаги дебютини айнан Генуя клубида амалга оширган. Орада "Монако" ва "Милан" каби жамоалардан сўнг италиялик страйкер "Торино"га қўшилди. 

Шомуродовнинг трансфер ҳуқуқи ҳали ҳам "Рома"га тегишли. Яқиндагина Элдорни Римга келишига асосий сабабчилардан бири бўлган Жозе Моуриньо истеъфога чиқарилди, янги бош мураббий эса Де Росси этиб тайинланди. Унинг ҳужумчимизга имкон бериш эҳтимоли кам. Манбалар уни кўпроқ Андреа Белоттига ишонч билдиришини айтмоқда. Бу шуни англатадики, энди нафақат Шомуродовнинг "Рома"ни тарк этиш эҳтимоли кўпайди, балки Сардор Азмун ҳам сотиб олинмаслиги мумкин.