Энди худбинлик қилмайман!

Англия Премьер-лигасида германиялик легионер Кай Хаверцнинг “Брентфорд” дарвозасига киритган голи “Арсеналга” ғалаба келтирди ва Микель Артета шогирдларини мусобақа жадвалида биринчи ўринга кўтарди.

Бунгача жуда кўп танқид қилинаётган Кай Хаверц ўзи қаҳрамонга айланган учрашувдан кейин фикрлари билан ўртоқлашди.

- Муҳим голни уриб, жамоа учун ғалаба келтирганимдан бахтиёрман. Бу ажойиб пасдан кейин киритилган зўр гол бўлди. Букайо Сака ва Мартин Эдегор тўпни ана шу тарзда етказиб беришни яхши кўради. Буни машғулотларда кўп такрорлаймиз.

Ҳеч нарса ўзидан ўзи бўлмайди. Бу машаққатли меҳнатлар самараси. Инсон ҳаракат қилиши ва ишониши керак. Мен худбинлигимни четга суришга қарор қилдим. Энг асосийси – бир жамоа бўлиш экан, - деди Кай Хаверц.

Хаверц Бундеслигада “Байер”  тўпурарларидан бўлган. 2020 йилнинг ёзида “Челси” уни 80 миллион еврога харид қилди. Бироқ ҳужумкор футболчи “аристократлар” сафида ўйнаб кета олмади.

Микель Артета германиялик футболчини ўтган ёз ўз жамоасига қўшиб олганди. “Канонирлар” трансферга 75 миллион евро сарфлаган. Аммо Хаверц “Арсенал”да ҳам кутилган даражага чиқиб олиш учун анча қийналди.