Флик: "9 очколик фарқ ҳали ҳеч нарсани ҳал қилгани йўқ"

"Барселона" бош мураббийи Ханс-Дитер Флик Ла Лига 31-туридан кейин жамоасининг "Реал"дан 9 очкога олдинлаб кетгани ҳақида фикр билдирди.

Шанба куни каталонияликлар "Эспаньол"ни 4:1 ҳисобида йирик мағлубиятга учратди. Ундан бир кун олдин эса "Реал" "Жирона" майдонида 1:1 ҳисобида дуранг ўйнади.

Фликнинг таъкидлашича, чемпионлик масаласида ҳали ҳеч нарса ҳал бўлгани йўқ.

"Ҳозирча ҳеч нарса тугамади. Биз ўз ишимизни охиригача бажаришимиз керак. Ҳаммаси ҳал бўлди, деб гапириш нотўғри, мен бундай муносабатни қабул қилмайман. Барчаси расман ҳал бўлмагунча, энг яхши футболимизни кўрсатишда давом этишимиз шарт. Энг муҳими — жамоанинг менталитети ва биз шу руҳда давом этамиз. Сешанба куни ҳам буни исботлашни хоҳлайман.

Биз умуман салбий фикрламаймиз. Аксинча, мен доим ижобий ўйлайман. Шу пайтгача эришган натижаларимиз ҳақида ўйлайман ва бу, айниқса, кўплаб жароҳатларга қарамай, фантастик натижа. Ҳозир эса футболчилар аста-секин сафга қайтмоқда", — деди Флик.