Флик ҳайдалди. “Эл-класико”да уни кўрмаймиз...

“Барселона” Испания чемпионатининг тўққизинчи турида ўз майдонида “Жирона”ни қабул қилиб, қийинчилик билан ғалабага эришди. Мезбонлар ғалаба тўпини ўйин якунланиши арафасида киритди.

Қизиғи шундаки, Рональд Араухо ғалаба тўпини киритишидан олдин “Барселона” бош мураббийи Ханс-Дитер Флик иккинчи сариқ карточкани олгани учун майдонни тарк этишга мажбур бўлди.

Ҳакам томонидан ҳайдалган германиялик мутахассис энди кейин турда “Реал” билан бўладиган “эл-класико”да ўзига ажратилган жойга киролмайди ва жамоани масофадан бошқаришига тўғри келади.

Чемпионликка асосий даъвогарлар – “Реал” ва “Барселона” ўртасидаги марказий учрашув 26 октябрь куни “Сантьяго Бернабеу”да бўлади. Унгача ҳар икки жамоа Европа Чемпионлар лигаси умумий гуруҳида уй учрашувларини ўтказиши белгиланган.

Хусусан, 21 октябрь куни “Барселона” ўз мухлислари кўз ўнгида Грециянинг “Олимпиакос” футболчиларини қабул қилади. Бир кундан кейин “Реал” Мадридда Италиянинг “Ювентус” жамоаси вакиллари билан куч синашади.