Футболда кўринмай кетган Погба ўзини санъатда топди

Айни вақтда допинг тақиқи туфайли футболчилик фаолиятида пауза қилаётган Поль Погба "4 ZERO" фильми премьерасида иштирок этди. 

Ҳозирда Погба футболчилик фаолияти билан шуғуллана олмайди. У футбол билан боғлиқ барча фаолият турларидан четлатилган. Аввалига унинг дисквалификация муддати 4 йил эди. Бироқ Спорт арбитажга берилган апелляциядан сўнг мазкур муддат 18 ойга қисқартирилди. 

Бундай ҳолатда Погба профессинал карьерасини 2025 йилда бошлаши мумкин. "BBC" нашри берган маълумотга кўра, Франция терма жамоаси ярим ҳимоячиси январь ойида машғулотларга қайтиши мумкин. 
.
Футболчиликда пауза қилган Поль айни вақтда бошқа машғулотлар билан банд. Май ойида у кино оламига кириб келаётгани ҳақида хабарлар тарқалганди. Уни Париж чеккасида суратга олиш пайтида кўришган. Суратга олиш жараёнида иштирок этаётганлардан бири: "Поль ўзининг табиий ва соддалиги билан ҳаммани ҳайратда қолдирди. У мазкур ишни жуда зўр уддалади", деганди. 





Француз катта экранда ўзининг премьерасини ўтказди. Француз "4 ZERO" фильми премьерасига рафиқаси Зулай билан биргаликда ташриф буюрди. 

"4 ZERO" фильмида роль ижро этганимдан жуда хурсандман", - дея ёзди футболчи ўз инстаграм саҳифасида. 

Аввалроқ, "Ювентус" клубининг техник директори Кристиано Жунтоли 31 ёшли франциялик ярим ҳимоячи Поль Погба жамоани тарк этишини тасдиқлаганди. 

"Погба ажойиб футболчи, аммо энди бизнинг бошқа режаларимиз бор. Биз бошқа ўйинчиларга сармоя киритдик, энди жамоамиз тўлиқ қуриб бўлинди", - дея Жунтолининг сўзларини келтирди журналист Фабрицио Романо Х ижтимоий тармоғида (собиқ Тwиттер).

Манбага кўра, франциялик футболчи “Ювентус”ни эркин агент сифатида тарк этади. 31 ёшли ярим ҳимоячининг клуб билан амалдаги шартномаси эса 2026 йилнинг ёзига қадар мўлжалланган.