Гурланда белбоғли кураш бўйича Ўзбекистон чемпионати ўтказилди

Аввал хабар берганимиздек, жорий йилнинг 20-23 апрель кунлари Хоразм вилоятининг Гурлан туманида илк бор  белбоғли кураш бўйича 2009-2010 йилларда туғилган ўғил болалар ва қизлар ўртасида Ўзбекистон чемпионати бўлиб ўтди. 

Спорт вазирлиги ҳамда Ўзбекистон белбоғли кураш федерациясининг йиллик тақвимидан жой олган мазкур мамлакат чемпионатида ўғил болалар белбоғли курашнинг эркин ва классик йўналишларида 13 та вазн тоифасида куч синашишган бўлса, қизлар эркин йўналишда 8 та вазн тоифасида беллашишди.

Гурлан спорт мажмуасида 500 нафардан ортиқ ёш полвонлар иштирокида юқори савияда ва шиддатли тусда ўтган ушбу мусобақада Ҳасанбой Жобборов (Наманган), Худоёр Холмирзаев (Фарғона), Айдос Эржанов (Қорақалпоғистон), Иброҳим Содиқов (Қашқадарё), Малика Бектурдиева (Хоразм), Абдивоит Маҳаммадов (Андижон), Шоҳжаҳон Раҳмонов (Бухоро), Жамшидбек Қуронбоев (Хоразм), Оғабек Тўлқинов (Сирдарё) сингари  маҳоратли спортчилар ўз вазн тоифаларида олтин медалларни қўлга киритишди. 

Беллашувлар якунлангач, ғолиб ва совриндорлар диплом ва медаллар билан тақдирланишди. Таъкидлаш жоиз, мусобақада ғолиб бўлган спортчилар белбоғли кураш бўйича халқаро мусобақаларда иштирок этиш йўлланмасига эга бўлишди. 

Илҳом РАҲМОНОВ тайёрлади