Гвардиола: "Мен услубимни ҳеч қачон ўзгартирмайман"

"Манчестер Сити" бош мураббийи Хосеп Гвардиола жамоанинг ўйин услуби ҳақида фикр билдирди.

Журналистлар ундан сўз оралиғида услуб ўзгарган-ўзгармаганини сўрашди.

"Ҳа, 18 та совринни қўлга киритгандан кейин услубимни албатта ўзгартириб юбораман ёки Премьер-лигада тўрт марта қаторасига чемпион бўлгандан сўнг ишончимни йўқотаман. Йўқ, мен ҳеч қачон ўз ишончим ва ғояларимдан қайтмайман!

Агар биз тўпни рақиб майдонида юқорида қайтариб олсак, тезкор ҳужум қилишни хоҳлайман. Агар рақиб юқори прессинг қўлласа ва биз биринчи босимдан чиқиб олсак, яна тезкор ҳужум қилишни хоҳлайман. Лекин кейин... мен тўпни миллион марта бир-бирига узатиб, ўйинни назорат қилишни яхши кўраман. Бу менга ёқади.

Менинг жамоаларим тўпга эгалик қилиб, ўйнашини истайман. Лекин айрим пайтларда тезкор ҳужум зарур бўлади. Биз бундан биринчи кунданоқ фойдаланганмиз: Лерой Сане ва Рахим Стерлинг машинадек югурарди, биз тезкор ҳужумлар қила олардик", – деди испаниялик мураббий.