Гвардиола қидирган футболчисини рақиб жамоадан топди

“Манчестер Сити” марказий ярим ҳимоячи Кирнан Дьюсбери-Холлни ўз сафига қўшиб олишни режалаштирмоқда. Бу ҳақда Fichajes нашри журналистлари хабар берди.

Манба маълумотларига кўра, “шаҳарликлар” 27 ёшли футболчига жиддий қизиқиш билдиряпти. Манчестер клуби скаутлари бу ўйинчини “Эвертон”га ўтишидан олдин ҳам кузатиб келган ва ҳозир ҳам унинг истеъдодини жуда юқори баҳоламоқда.

Кирнан Дьюсбери-Холл аслида “Лестер” клуби тарбияланувчиси ҳисобланади. Турли йилларда “Блэкпул” ва “Лутон” каби қуйи лига жамоаларига ижарада юрган.

2024 йилнинг ёзида “Челси” бу ўйинчини “Лестер”дан 35,4 миллион еврога трансфер қилди ва бир йилдан кейин “Эвертон”га 18,6 миллион евро, яъни зарарига сотиб юборди.

Энди “Манчестер Сити” нишонига тушган футболчининг трансфер қиймати тахминан 46 миллион еврони ташкил этиши мумкин.

Жорий Премьер-лига мавсумида Дьюсбери-Холл 18 та ўйинда майдонга тушиб, бешта гол ва тўртта голли узатма қайд этган. Унинг “Эвертон” билан шартномаси 2030 йилнинг ёзигача амал қилади. Transfermarkt унинг қийматини 28 миллион евро, деб баҳолаган.