"Интер" ва "Галатасарой" ярим ҳимоячи трансфери бўйича музокараларни бошлади

"Интер" ва "Галатасарой" Хакан Чалханоглунинг трансфери бўйича музокараларни бошлади. Бу ҳақда инсайдер Фабрицио Романо маълум қилмоқда.

Аввалроқ, туркиялик ярим ҳимоячи ва унинг жамоадошлари ўртасида келишмовчилик юзага келганди.

Клублар ўртасидаги Жаҳон чемпионатининг 1/8 финалида "Интер"нинг "Флуминенсе"га (0:2) мағлубиятидан сўнг Лаутаро Мартинес шундай деган эди: "Қолишни истасангиз - қолинг, истамасангиз - кетинг."

Клуб президенти Беппе Маротта Лаутаро, эҳтимол, Чалханоглуга мурожаат қилганини айтди. Миланликлар бош мураббийи Кристиан Киву вазиятни ҳал қилиш учун фавқулодда йиғилиш ўтказди.

Хакан 2021 йилдан бери "Интер" сафида ўйнамоқда. Ўтган мавсумда 31 ёшли ярим ҳимоячи клуб учун барча мусобақаларда 47 та ўйинда иштирок этиб, 11 та гол урди ва 8 та голли узатма берди.