Ислом Иномов: «Футбол интернатида бир неча йиллардан бери газ йўқ»

Футболни якунлагач, фаолиятингизни Тошкент вилоятининг футбол маҳорат мактабида селекционер сифатида  бошладингиз. Айтингчи, интернатда аҳвол ҳали-ҳамон оғирми?

-  Афсуски, шундай. Муаммоларнинг энг каттаси газнинг йўқлигида. Биласизми, шароитлар жуда ҳам ёмон. Газ бўлмаганидан кейин, қишда болаларнинг шамоллаб қолиши жуда кўп кузатилади. Иситиш тизимининг йўқлиги боис, таъмирдан чиққан бинолар ҳам жуда ёмон аҳволга тушиб қолмоқда. Бу омил футболчиларнинг соғлиғига, балки руҳиятига ҳам таъсир кўрсатади. Айниқса, қишда вазият жуда ҳам ёмонлашади. Иситиш учун кўмирдан фойдаланамиз. Юк машиналарида олиб келинган кўмирни сақлаш учун бизда омборхона йўқ. Шу боис, уни ташқарида қолдиришга мажбурмиз. Натижада, кўмир ёғингарчиликда кўчада қолиб кетади. Бу борада бир нечта ташкилотларга мурожаат этдик, аммо бир неча йиллардан бери муаммонинг ечими йўқ.

-  Болалар футболидаги селекция ишлари қай даражада кетмоқда? Негадир иқтидорларни барчаси ҳам керакли қўлларга етиб келмаяпти. Бунинг асосий сабаби нимада?

-  Биласизми, авваллари болалар футболида ишлаш енгилроқ эди. Барча маҳаллаларда футбол ўйнаш учун шароитлар яратилган бўлиб, ҳеч бўлмаганда мактаб стадионлари бўш эди. Ҳозир эса, ҳаммаси хусусий мулкка айланган. Олдинлари ҳеч бўлмаганда иккита тошни қўйиб бўлса-да, ёш болалар тўп тепган. Ҳозир ҳамма ерда уй қуриш авж олди. Бўш ареналар йўқ. Боз устига, сунъий чим ёткизилган стадионларнинг барчаси пуллик. Камида соати 70 минг сўм. Бу ҳамманинг ҳам чўнтагига тўғри келавермайди. Шу боис, болаларнинг қандай тўп сураётганини кўришнинг имкони йўқ. Барча вилоятдаги жамоалар биринчи навбатда, ўз футболчиларини бизга кўрсатишга уринади. Бизда улардан бошқаларни ҳам томоша қилиш имкони йўқ. Сабаби, футбол мусобақалари жуда оз. Турнир ўтказилса ҳам, барча футбол мактаблари ўз жамоалари билан келади. Бу нари борса 200 та болани кўздан кечириш, дегани.

-  Айтингчи, болалар футболидаги энг оғриқли муаммо нимада?

-  Ачинарлиси шундаки, ҳозир футбол ҳақида умуман тушунчага эга бўлмаган мураббийлар сони ортиб кетди. Уларга интернат қанча маош тўлайди, деб ўйлайсиз? Бонусларни ҳисобга олмаганда, бор йўғи 1,5-2 миллион сўм. Бу пулларга оилани боқиб бўладими? Футболдан чиққанларни бу сумма қаноатлантирмайди. Шундай экан, улар ёшлар мураббийи бўлишдан кўра, бошқа иш билан шуғулланишни афзал кўради. Футбол ҳақида умуман тушунчага эга бўлмаганлар учун эса, бу қулай имконият. Ўқув курсларини тугатади ва дарров болалар мураббийига айланади. Ўзи футболчи бўлмаган инсон болаларга нимани ўргатиши мумкин? Ҳеч нарсани! Сабаби, унинг ўзида кўникма ва тушунча йўқ. Бундай «мураббийлар» сабабли болаларда ўсиш кузатилмайди.

Тўлиқ интервью сайтимизнинг "You Tube"даги расмий саҳифасига юкланди. Тўлиқ томоша қилишни унутманг. Кетган вақтингизни ачинмайсиз!

Матнда хатолик топсангиз, ўша хатони белгилаб, бизга жўнатинг (Ctrl + Enter)