Ислом Махачев: "Иан Гаррини камтар қилиб қўяман"

Ушбу ҳафта охирида бўлиб ўтадиган "UFC 330" турнирида амалдаги чемпион Ислом Махачев хавфдан қўрқмайдиган Иан "Мачадо" Гаррига қарши ўз камарини ҳимоя қилади. Жанг олдидан томонлар орасида катта можаро ёки кескин баёнотлар кузатилмади. Фақатгина Махачевнинг менежери ижтимоий тармоқларда ва бир неча суҳбатларда Гаррини қаттиқ танқид қилиб келмоқда.

Иан эса, аксинча, бир неча бор Ислом Махачевнинг UFC да қўлга киритган ютуқларини эътироф этган. Унга кўра, 34 ёшли россиялик ҳозирги кунда дунёдаги энг кучли ва энг истеъдодли аралаш жанг санъати устаси ҳисобланади. Шу билан бирга, ирландиялик 16 август куни Махачевни мағлуб этишига ишонч билдирган.

Белал Муҳаммадни ўтган йили мағлуб этганидан сўнг, “The Future” лақабини олган Гарри Ислом ва UFC раҳбарияти эътиборини тортиш учун қўлидан келган барча ишни қилди ва бу унга титул жангига чиқиш имконини берди. Энди эса у фақат ғалаба қозонишни эмас, балки "UFC 330" октагонида уч раунд давомида рақибини тўлиқ устунлик билан босим остида ушлаб туришни, тўртинчи раундда эса жангни якунлашни режалаштирган.

Гаррининг сўнгги баёнотлари билан танишган Ислом Махачев "UFC 330 Embedded" видеоблогида қуйидагича фикр билдирди:

“Ианнинг камтар йигит эканини биламан. Агар шундай бўлмаса, биз уни камтар қиламиз. Унинг маҳорати ва тажрибасини ҳурмат қиламан. Тан олиш керак, бу бошқа вазн, бу ерда катта йигитлар бор. Ҳақиқий даъвогарлар шу ерда. Шунинг учун мен янада кўпроқ машқ қилиб, диққатимни йўқотмаслигим керак”, - деди россиялик.