"ЖЧ-2026" учун янги қоидалар: Ўзбекистон терма жамоаси либосига махсус белги қўйилади

2026 йилги Жаҳон чемпионатида ФИФА бир қатор янгиликларни жорий қилди. Улардан бири турнир иштирокчиларига бериладиган махсус эсдалик шевронлари (либосга тикиладиган махсус белги) бўлди.

ФИФА уч турдаги шевронларни тақдим этди:
Дебют — Жаҳон чемпионатида илк бор иштирок этаётган футболчилар учун;
Мерос (Heritage) — мундиалда бешинчи ёки ундан кўп бор қатнашган футболчилар учун;
Олтин шон-шуҳрат (Golden Glory) — аввалги Жаҳон чемпионатларида индивидуал мукофотларни қўлга киритган футболчилар учун.

Шу тариқа, Ўзбекистон терма жамоасининг барча 26 футболчиси Колумбияга қарши илк учрашувда ўнг енгида дебютант шеврони билан майдонга тушади. Биринчи ўйинда қатнашган футболчилар кейинги баҳсларда ушбу белгини тақмайди. Захирада қолган футболчилар эса мундиалдаги илк ўйинини ўтказгунига қадар дебютант шеврони билан майдонга тушишда давом этади.

Шунингдек, Испания юлдузи Ламин Ямал ва Норвегия ҳужумчиси Эрлинг Холанд ҳам турнирни дебютант шеврони билан бошлайди.

"Мерос" ва "Олтин шон-шуҳрат" шевронларига эга футболчилар сони эса унчалик кўп эмас. Улар орасида Хамес Родригес, Харри Кейн, Килиан Мбаппе, Тибо Куртуа, Эмилиано Мартинес, Лионель Месси, Лука Модрич, Криштиану Роналду, Мануэль Нойер ва Юто Нагатомо каби юлдузлар бор.

Қизиғи, Лионель Месси ва Лука Модрич икки хил шеврон билан ҳаракат қилади. Месси мундиалдаги олтинчи, Модрич эса бешинчи иштирокини ўтказаётгани, шунингдек, аввалги турнирларда индивидуал мукофотларни қўлга киритгани сабабли уларнинг ҳар икки енгида алоҳида шеврон бўлади.