Katanets: "O'zbekistondan Jahon chempionatida katta natija kutmang"

O‘zbekiston terma jamoasining sobiq bosh murabbiyi Srečko Katanets Jahon chempionatidagi debut oldidan mamlakat muxlislariga murojaat qildi.

Sloveniyalik mutaxassis 2025 yil yanvar oyigacha terma jamoani boshqargan va jamoaning mundialga chiqishi uchun mustahkam poydevor yaratgan edi. Sog‘ligi bilan bog‘liq muammolar sabab u o‘z lavozimini tark etgan bo‘lsa-da, O‘zbekistonda hanuz katta hurmatga ega.

Katanetsning ta’kidlashicha, muxlislar terma jamoadan haddan tashqari yuqori natija kutmasliklari lozim.

"Barcha o‘zbekistonliklarga bitta xabarim bor: jamoadan Jahon chempionatida katta natija kutishmang. Chunki bunday turnirda birinchi ishtirokdayoq sezilarli muvaffaqiyatga erishish juda qiyin.

Bu jarayon va rivojlanishning bir qismi. Sizlardan faqat har bir lahzadan zavq olishingizni so‘rayman", — dedi Katanets.

Sobiq murabbiyning fikricha, Kolumbiya, Portugaliya va Kongo DR bilan bir guruhdan chiqish oson vazifa emas. Shuning uchun O‘zbekistonning ilk mundialdagi ishtirokini tarixiy voqea sifatida qadrlash kerak.

Ayni paytda Fabio Kannavaro boshchiligidagi O‘zbekiston terma jamoasi Atlanta shahrida Kolumbiyaga qarshi birinchi uchrashuvga tayyorgarlik ko‘rmoqda. Italyanlik mutaxassis jarohatdan qiynalayotgan Jaloliddin Masharipovning holatini diqqat bilan kuzatmoqda.

Kannavaro esa o‘z futbolchilaridan jasur va kurashchan o‘yin kutayotganini ta’kidladi.

"Bu bizning ilk Jahon chempionatimiz. Yo‘qotadigan hech narsamiz yo‘q. Qo‘rqovni chetga surib, 90 daqiqa davomida haqiqiy jangchilardek harakat qilishimiz kerak", — dedi murabbiy.

O‘zbekiston terma jamoasi guruh bosqichida Kolumbiya, Portugaliya va Kongo DR terma jamoalariga qarshi bahs olib boradi.