Катанец: "Ўзбекистондан Жаҳон чемпионатида катта натижа кутманг"

Ўзбекистон терма жамоасининг собиқ бош мураббийи Сречко Катанец Жаҳон чемпионатидаги дебют олдидан мамлакат мухлисларига мурожаат қилди.

Словениялик мутахассис 2025 йил январь ойигача терма жамоани бошқарган ва жамоанинг мундиалга чиқиши учун мустаҳкам пойдевор яратган эди. Соғлиғи билан боғлиқ муаммолар сабаб у ўз лавозимини тарк этган бўлса-да, Ўзбекистонда ҳануз катта ҳурматга эга.

Катанецнинг таъкидлашича, мухлислар терма жамоадан ҳаддан ташқари юқори натижа кутмасликлари лозим.

"Барча ўзбекистонликларга битта хабарим бор: жамоадан Жаҳон чемпионатида катта натижа кутишманг. Чунки бундай турнирда биринчи иштирокдаёқ сезиларли муваффақиятга эришиш жуда қийин.

Бу жараён ва ривожланишнинг бир қисми. Сизлардан фақат ҳар бир лаҳзадан завқ олишингизни сўрайман", — деди Катанец.

Собиқ мураббийнинг фикрича, Колумбия, Португалия ва Конго ДР билан бир гуруҳдан чиқиш осон вазифа эмас. Шунинг учун Ўзбекистоннинг илк мундиалдаги иштирокини тарихий воқеа сифатида қадрлаш керак.

Айни пайтда Фабио Каннаваро бошчилигидаги Ўзбекистон терма жамоаси Атланта шаҳрида Колумбияга қарши биринчи учрашувга тайёргарлик кўрмоқда. Италиялик мутахассис жароҳатдан қийналаётган Жалолиддин Машариповнинг ҳолатини диққат билан кузатмоқда.

Каннаваро эса ўз футболчиларидан жасур ва курашчан ўйин кутаётганини таъкидлади.

"Бу бизнинг илк Жаҳон чемпионатимиз. Йўқотадиган ҳеч нарсамиз йўқ. Қўрқувни четга суриб, 90 дақиқа давомида ҳақиқий жангчилардек ҳаракат қилишимиз керак", — деди мураббий.

Ўзбекистон терма жамоаси гуруҳ босқичида Колумбия, Португалия ва Конго ДР терма жамоаларига қарши баҳс олиб боради.