Клопп Нагельсманндан узр сўради: "59 ёшга киряпман, аммо ҳали ҳам аҳмоқман"

"Ливерпуль"нинг собиқ бош мураббийи Юрген Клопп Германия терма жамоаси устози Юлиан Нагельсманндан омма олдида узр сўради.

Аввалроқ Клопп ва Томас Мюллер Жаҳон чемпионатида эксперт сифатида ишлаётган пайтда Нагельсманнга Жамал Мусиалани асосий таркибдан чиқариб, унинг ўрнига Дениз Ундавни туширишни тавсия қилганди. Шунингдек, Клопп: "Яхшиямки, таркибни ҳали ҳам Юлиан Нагельсманн танлаяпти", деган эди.

Бу гапларга жавобан Нагельсманн: "Юрген ва Томас футболда катта ютуқларга эришган. Улар истаган фикрини билдириш ҳуқуқига эга", деган эди.

Германиянинг Кюрасао устидан 7:1 ҳисобидаги йирик ғалабасидан кейин Клопп эфирда Нагельсманндан кечирим сўради.

"Айтадиган яна бир гапим бор. Биз норасмий тарзда терма жамоанинг бир қисми ҳисобланамиз ва ҳар доим сизларни қўллаб-қувватлаймиз.

Мен йилнинг энг ёмон иборасини айтдим: "ҳали ҳам". Бу гапим учун ўзимга тарсаки туширгим келади. Аммо жуда кеч эди, чунки мен телевидениеда эдим. Бу шунчаки эҳтиётсизлик билан айтилган сўз бўлиб, аслида ҳеч қандай маъно англатмасди.

Шуни тушундимки, икки кундан кейин 59 ёшга тўламан ва ҳали ҳам аҳмоқман. Сиз нима қилсангиз ҳам, биз сиз томондамиз. Жараёнга халал бермоқчи эмасмиз", — деди Клопп.

Маълум қилинишича, ушбу сўзлардан кейин Нагельсманн кулган ва интервью якунида Клопп ҳамда Мюллер билан қўл бериб кўришган.