Клопп “Реал”га келса, олинадиган футболчилар рўйхатини берди

Мадриднинг “Реал” клуби бош мураббий масаласини тўлиқ ҳал қилгани йўқ. Гарчи Хаби Алонсо истеъфога чиқарилганидан кейин унинг ўрнини Альваро Арбелоа эгаллаган бўлса-да, ҳали бу мутахассис топ-даражада ишламагани унга панд бериши мумкин.

“Қироллик клуби” бош мураббий лавозимига Юрген Клоппни мўлжаллаяпти. Германиялик мутахассис “Реал”ни бошқаришга мойиллик билдиргани айтилмоқда.

Шу билан бирга агар Клопп Мадридга келадиган бўлса, жамоада бир қатор ўзгаришларни талаб қилади. Бу ҳақда TEAMtalk испан манбаларига таяниб хабар бермоқда.

Унга кўра, 58 ёшли мураббий икки нафар янги марказий ҳимоячи харид қилинишини истайди. Клопп “Бавария” ҳимоячиси Дайо Упамеканога қизиқиш билдирган. Шунингдек, у “Кристал Пэлас”дан Марк Гехини ҳам кўришни истаган, аммо футболчи “Манчестер Сити”ни танлаб бўлди.

Бундан ташқари, Клопп чап ҳимоячи позициясини кучайтиришни режалаштирмоқда ва бу позиция учун “Борнмут” футболчиси Алекс Хименес номзод сифатида кўрилмоқда.

Яна бир устувор йўналиш — марказий ярим ҳимоя. Клопп ўз рўйхатига “Ньюкасл”дан Бруно Гимарайнс ва “Штутгарт”дан Ангело Штиллерни киритди.

Шунингдек, “Реал”га янги ўнг қанот ҳужумчиси ҳам керак, эҳтимолий вариант сифатида “Боруссия Дортмунд” етакчиси Карим Адейеми тилга олинмоқда.