Коронавирус туфайли яна бир мураббий вафот этди

Аёллар кураши бўйича Россия терма жамоаси бош мураббийи Магомед Алиомаров коронавирус сабабли вафот этди. 67 ёшли Алиомаров бир неча кундан бери Доғистондаги шифохоналарнинг бирида даволанаётган эди. Сўнгги кунларда эса уни сунъий нафас олдириш мосламасига улаб қўйишганди.

Маълумот учун, Магомед Алиомаров ўтган йилнинг февраль ойида Россия терма жамоаси бош мураббийлик лавозимида Юрий Шахмурадовнинг ўрнини эгаллаганди. Унинг қўл остидаги Россия аёллар терма жамоаси 2019 йили Қозоғистоннинг Нур-Султон шаҳрида ўтказилган жаҳон чемпионатида умумжамоа ҳисобида иккинчи ўринни банд этган эди.

умер

Ўша жаҳон чемпионатида Алиомаров шогирдлари 2 та олтин, 1 та кумуш, 2 та бронза медалини қўлга киритганди. Шу йилнинг февралида Италиянинг Рим шаҳрида ўтган Европа чемпионатида эса россиялик курашчи қизлар 4 та олтин, 1 та кумуш, 4 та бронза медали билан умумжамоа ҳисобида биринчи ўринни банд этишган эди. Россияликлар сафида Ольга Хорошавцева, Ханум Велиева, Екатерина Букина ва Наталья Воробьева шоҳсупанинг энг юқори поғонасига кўтарилишганди.

Ўзбекистон спорт курашлари ассоциацияси матбуот хизмати

Матнда хатолик топсангиз, ўша хатони белгилаб, бизга жўнатинг (Ctrl + Enter)