Ламин Ямал: Сен кимсан, тентак?

“Барселона” ҳужумкор футболчиси Ламин Ямаль Испания кубоги ярим финали биринчи учрашувидан кейин “Атлетико” футболчилари билан жанжаллашди.

Ушбу баҳсда каталонияликлар кутилмаганда мезбонларга 0:4 ҳисобида имкониятни бой берди ва шу тариқа, “Барселона”нинг финалга чиқиш имконияти сезиларли даражада пасайиб кетди.

Ламин Ямал иштирокидаги ҳодиса учрашув якунланганидан кейин рўй берди. 18 ёшли футболчи “Атлетико” ўйинчиси Марк Пубиль билан баҳслашаётган паллада гапга аргентиналик ҳимоячи Науэль Молина аралашди.

Бу ҳолат Ламинга ёқмади. TyC Sports нашри бу вазиятда Ламин Ямалнинг Молинани ҳақорат қилиб, унга “Сен кимсан? Сен кимсан? Аҳмоқ, тентак”, - деган сўзларини келтириб ўтди.

Испания Кубоги ярим финалининг жавоб учрашуви энди “Барселона” майдонида 3 март куни бўлиб ўтади.

Каталонияликлар ушбу мусобақанинг амалдаги ғолиби ҳисобланади. Аввалги мавсум финалида улар қўшимча вақтда мадриднинг «Реал» жамоасини 3:2 ҳисобида мағлуб этган эди.